Astanada Dúnıejúzilik munaı keńesiniń otyrysy ótedi
ASTANA. QazAqparat - 1-3 qazan aralyǵynda Astanada Dúnıejúzilik munaı keńesiniń otyrysy ótedi, dep habarlaıdy QazAqparat tilshisi.
«1-3 qazan aralyǵynda Astanada Dúnıejúzilik munaı keńesiniń otyrysy ótedi. Oǵan keńestiń ulttyq komıtetterine múshe elder, salalyq mınıstrlikterdiń basshylary, energetıkalyq kompanııalar men iri qaýymdastyqtary basshylarynyń qatysýy josparlanyp otyr. Sonymen qatar, atalǵan keńeste atqarýshy jáne baǵdarlamalyq komıtetterdiń kezdesýleri, sondaı-aq jas mamandardyń qatysýymen birqatar is-sharalar ótedi», - dedi QR SІM resmı ókili Aıbek Smadııarov búgingi brıfıng barysynda.
Onyń aıtýynsha, forým aıasynda ınvestıtsııalyq múmkindikter, turaqty ósimge arnalǵan jańa sheshimder taqyrybynda arnaıy konferentsııanyń ótkizilýi josparlanýda.
«Atalǵan is-shara álemdik qoǵamdastyqtyń nazaryn aýdarýǵa jáne jalpy Qazaqstannyń munaı ónerkásibiniń ınvestıtsııalyq tartymdylyǵyn arttyrýǵa baǵyttalǵan», - deıdi ol.
