Astanada dúleı jel elordalyqtardy edáýir ábigerge saldy
ASTANA. QazAqparat - Astanada dúleı jel elordalyqtardy edáýir ábigerge salyp, birqatar tótenshe oqıǵalarǵa sebep boldy, dep habarlaıdy QazAqparat.
Búgin saǵat 14:15-te Astana temirjol vokzalynyń perrony aýmaǵy 40 sharshy metr bolatyn qalqa opyrylyp, «Astana-Lenınogorsk» poıyzynyń vagonyna qulady. QTJ-nyń aldyn ala boljamy boıynsha, bul oqıǵa jeldiń qatty uıytqýy jáne qardyń kóp túsýi sebebinen oryn alǵan. Abyroı bolǵanda jolaýshylarǵa esh zaqym kelmedi.
Táýelsizdik dańǵylynda KFC kompanııasynyń úlken bılbordy jeldiń qarqynyna shydamaı, jerge qulady.
Sonymen qatar, jel men kóktaıǵaq saldarynan birqatar jol-kólik apattary oryn aldy. Astanada jeńil kólik júrgizýshisi rýlge ıe bola almaı, kóshege jaryq beretin baǵandy soǵyp qulatty.
Aıta keteıik, «Qazgıdromet» Astanada 25 qańtar kúni atmosferalyq fronttardyń ótýine baılanysty turaqsyz aýa raıy saqtalyp, burqasyn soǵyp, 15-20 m/s ekpinmen soqqan jeldiń jyldamdyǵy 25, kúndiz 30 m/s-qa kúsheıedi dep habarlaǵan bolatyn.
Qatty jeldiń sebebinen elordada 1-9 synyp oqýshylary úshin sabaq bolǵan joq.
