Astanada dúkender men dámhanalarǵa qaýipti et jetkizgen jasyryn tseh anyqtaldy
ASTANA. KAZINFORM — Astanada zańsyz jasyryn et óńdeý tsehy joıyldy.
Elordada jedel-profılaktıkalyq is-sharalar barysynda polıtsııa qyzmetkerleri jeke turǵyn úılerdiń birinde zańsyz jumys istegen et ónimderin óńdeý tsehyn anyqtady.
Tekserý barysynda óndiristiń eshqandaı ruqsat qujattarynsyz júzege asyrylǵany belgili boldy. Daıyn ónimder qalanyń jeke dúkenderi men dámhanalaryna jetkizilip otyrǵan. Demek, bul ónimder kez kelgen ýaqytta elorda turǵyndarynyń dastarhanyna túsýi múmkin bolǵan.
— Tekserý kezinde shyǵý tegi men sapasy belgisiz úsh tonnadan astam et ónimi anyqtaldy. Sondaı-aq ónimderdiń sanıtarııalyq talaptary óreskel buzyla otyryp óndirilgeni jáne saqtalǵany belgili boldy: temperatýralyq rejımder saqtalmaǵan, et antısanıtarııalyq jaǵdaıda saqtalǵan. Ettiń bir bóliginde búlinýdiń aıqyn belgileri baıqalǵan — ótkir jaǵymsyz ıis shyqqan, shybyndar qaptaǵan jáne taǵam retinde paıdalanýǵa jaramsyz ekenin kórsetetin ózge de belgiler anyqtalǵan, — delingen polıtsııa habarlamasynda.
Júrgizilgen is-sharalardyń nátıjesinde anyqtalǵan barlyq ónim joıyldy. Polıtsııa qyzmetkerleriniń der kezinde aralasýynyń nátıjesinde adam densaýlyǵyna qaýip tóndiretin et ónimderi saýdaǵa jiberilmeı, elorda turǵyndaryna jetken joq.
Zańsyz tseh ıeleri qoldanystaǵy zańnamaǵa sáıkes jaýaptylyqqa tartyldy.
