Astanada dýatlonnan jarys ótedi
ASTANA. QazAqparat - 26 maýsymda Elorda kúnin merekeleýge oraı Astanada dýatlonnan ashyq qalalyq týrnır ekinshi ret ótkiziletin bolady, dep habarlady qala ákiminiń saıty.
Bıyl jarysqa qatysýshylar 25 shaqyrym qashyqtyqty baǵyndyrmaq. Joldyń jalpy uzyndyǵy kezdeısoq tańdalyp otyrǵan joq - ol Qazaqstan Respýblıkasy táýelsizdiginiń 25 jyldyq mereıtoıyna oraılastyrylǵan.
«Astana-dýatlon - 2016» jarysyna 16 jastan asqandardyń bári de qatysa alady. Biraq 18-ge tolmaǵandar tirkelý úshin ata-anasynyń jazbasha ruqsatyn ákelýi kerek. «Astana-dýatlon - 2016» jarysyna qatysýshylar ózderimen birge jeke kýálikterin ala kelýi qajet.
Qatysýshylardy tirkeý shara ótetin kúni «Báıterek» monýmentiniń aldyndaǵy alańda tańǵy saǵat 7-den bastalyp, týrnırge 15 mınýt qalǵanda aıaqtalady. Dýatlon tańǵy saǵat 10.00 bastalady.
Týrnır úsh kezeńnen turady: aldymen qatysýshylar 5 shaqyrym júgirip ótedi, sodan keıin 15 shaqyrymdy velosıpedpen júredi, al sońǵy kezeńde - taǵy da 5 shaqyrym qashyqtyqqa júgiredi.
Byltyrǵydaı árbir qatysýshynyń ýaqyty jeke belgilenedi, jarys qorytyndysy boıynsha jeńimpazdarǵa baǵaly syılyqtar tabystalady. Saltanatty marapattaý rásiminen keıin «Báıterek» monýmentiniń aldyndaǵy alańda dýatlonǵa qatysýshylar men shara qonaqtarynyń nazaryna kontserttik baǵdarlama usynylady.
