Astanada dostyq festıvali ótti

Osymen 5-i márte uıymdastyrylǵan festıvalde 20-dan astam etnomádenı birlestiktiń shyǵarmashylyq jastar uıymdary óz salt-dástúrleri men  ónerlerin kórsetti. Ondaǵy maqsat-  jastar arasyndaǵy etnosaralyq yntymaqtastyqty damytý men olardyń shyǵarmashylyq qabiletterin arttyrý. 

 «Jyl boıy qala ákimdiginiń uıymdastyrýymen jastarǵa baǵyttalǵan kóptegen is-sharalar ótýde, sol sharalarǵa qalamyzdaǵy 20-dan astam etnomádenı birlestiktiń jastary da belsene qatysýda. Búgingi festıval sol jyl boıy bolǵan barlyq is-sharalardy qorytyndylaıtyn gala-kontsert desekte bolady. Jáne elimizdegi barlyq ult ókilderiniń yrys yntymaǵy men berik dostyǵynyń belgisi», - dedi Astana Qoǵamdyq damý isteri basqarmasynyń Jastarmen jumys bólim basshysy Baqytjan Júnisbekov.

Onyń aıtýynsha, Elorda jastaryna arnalǵan sharalar bunymen bitpeıdi jyl sońyna deıin «Elorda daryny» syılyǵy, Astana jastarynyń kúzgi baly jáne vaınerler festıvali ótedi.

Sonymen qatar, B.Júnisbekov 2019 jyly jastar jyly dep atalyp ótetindikten, oǵan Astana jastarynyń belsene atsalysatynyn aıta kele: «Ózderińiz biletindeı kúni keshe Astana jastarynyń «Jastar jalyny» forýmy ótti, atalǵan sharaǵa 1000-ǵa jýyq jastar qatysyp, onda arnaıy shaqyrylǵan qonaqtar úlgi bolar, ómirlik sabaq alýǵa turarlyq dáristerimen bólisti. Forýmnyń nátıjesinde bizge kóptegen usynystar men jobalar kelip tústi, endi sol bastamalardy jınaqtap kelesi jastar jylyna oraı aýqymdy  baǵdarlamalar men sharalar keshenin daıyndaıtyn bolamyz», - dedi ol. 

Aıta ketsek, keshe Astanada qala ákimdiginiń uıymdastyrýymen «Jastar jalyny» forýmy ótti onda 5 baǵyt boıynsha, 20-ǵa jýyq spıker óz jetistikterimen bólisken bolatyn. 

Qalanyń stýdent jastary men etnomádenı birlestikteriniń kóshbasshylary qatysqan festıval aıasynda, jyldyq jumys qorytyndysy boıynsha úzdik etnomádenı birlestikter estelik syılyqtarmen marapattaldy.