Astanada dop qaldyǵyn jutyp qoıǵan delfın qutqaryldy
ASTANA. QazAqparat - Astana qalasyndaǵy delfınarıılerdiń birinde sý janýary jattyǵý barysynda dop qaldyǵyn jutyp qoıǵan, dep habarlaıdy Habar 24.
Sonan oıyn-saýyq mekemesiniń qyzmetkerleri dereý dabyl qaǵyp, aqhalattylardyń kómegine júginedi.
«QR Prezıdenti is basqarmasy» medıtsınalyq ortalyǵy aýrýhanasynyń endoskopıst-dárigerleri jedel oqıǵa ornyna baryp, delfın aǵzasyn zerttep, 20 mınýt ishinde onyń asqazanyn tazartyp bergen. Osylaısha olar alǵash ret veterınar áriptesteriniń qyzmetin abyroımen atqaryp, erlik jasady.
Aıta keteıik, shaǵyn operatsııaǵa 4 dáriger men 2 meıirbıke qatysty.
«Biz tez arada endoskopııalyq apparatymyzben Arsen Túsipbaev basqarǵan toppen, ol endoskoppen asqazanyna kirdi, ishinde bógde zatty anyqtadyq. Endoskopııalyq shıptsymen alýǵa tyrystyq, biraq múmkin bolmady. Óıtkeni taıǵanaq, syrǵanaq boldy. Sodan keıin qolymyzben alýǵa tyrystyq», - deıdi QR Prezıdenti is basqarmasynyń medıtsınalyq ortalyǵy aýrýhanasynyń dárigeri Jeńisbek Tyńkózıev.
«Biz jedel kómek kórsetken dárigerlerge alǵysymyzdy bildiremiz. Jattyqtyrýshylarymyzdyń kúndelikti kezekshiligine qaramastan, áli qylyǵy basyla qoımaǵan kishi delfınderimizdiń biri dopty tisimen jaryp, bir bóligin jutyp qoıdy. Birden bilikti endoskopıst mamandardyń kómegine júgindik», - dedi delfınarıı jetekshisi Lázzat Tursynbaeva.
Qazir Deıson atty 2 jasar delfınniń jaǵdaıy jaqsy. Muny haýyzdaǵy onyń erkin júzýi men belsendiliginen ańǵarýǵa bolady. «Budan bylaı doppen bolatyn jattyǵýlar muqııat oryndalady», -deıdi delfınarıı qyzmetkerleri.
