Astanada «Don Kıhot» baleti ashyq aspan astynda ótkiziledi
ASTANA. QazAqparat - «Astana Opera» memlekettik opera jáne balet teatry ashyq aspan astynda L. Mınkýstyń «Don Kıhot» baletin usynady. Teatrdyń baspasóz qyzmetiniń habarlaýynsha, QR Mádenıet jáne sport mınıstrligi, «Qazaq áýenderi» AQ-men birlesip qoıylatyn horeografııalyq týyndy 25 maýsymda Beıbitshilik jáne kelisim saraıynyń aldyndaǵy alańda ótedi.
Onyń qoıýshy - baletmeısteri - Reseıdiń halyq ártisi, «Astana Opera» baletiniń kórkemdik jetekshisi, Qazaq ulttyq horeografııa akademııasynyń rektory Altynaı Asylmuratova. Aıta keterligi, spektakl EKSPO-2017 mádenı baǵdarlamasyna engizilgen.
L. Mınkýstyń tanymal baleti ıspan ádebıetiniń alǵashqy iri eskertkishteriniń biri - Mıgel Servantestiń «Lamanchalyq aılaker ıdalgo Don Kıhot» ataqty romanynyń jelisi boıynsha qoıylǵan. Oqıǵalar jelisi boıynsha saıahatshy rytsar Don Kıhot óziniń atqosshysy Sancho Pansamen birge Barselonanyń ortalyq alańyna keledi. Onyń kómeginiń arqasynda shashtaraz Bazılge ǵashyq sulý qyz Kıtrı ózi súımeıtin - baı dvorıan Gamashqa uzatpaqshy bolǵan ákesinen qashyp ketedi. 
«Bizdiń ujymnyń aldynda - ashyq alańda bolsyn nemese teatr sahnasynda bolsyn barlyq jerde jaqsy bıleý mindeti tur. Bastapqyda qoıylym barysynda túrli tehnıkalyq ádis-tásilderdiń kómegimen dekoratsııalardy aýystyrý kózdelgen. Osy joly spektakl ashyq aspan astynda kórsetýge beıimdelgen. Beıbitshilik jáne kelisim saraıynyń eteginde shýly Barselonanyń jaıma-shýaq merekesi ornaıdy. Sonymen qatar, biz barlyq qonaqtardy «Astana Opera» teatryna shaqyramyz, munda olar osy qyzý ári asqan sheberlikpen oryndalǵan baletti eshbir yqshamdaýsyz kóre alady»,- dep atap ótti Altynaı Asylmuratova.
Jas qamsyz Kıtrıdiń partııasyn Ánel Rústemova oryndaıdy, onyń súıiktisi Bazıldi Qazaqstannyń eńbek sińirgen qaıratkeri Taıyr Gataýov usynady. Kez-kelgen erlikke jáne qaıyrymdy isterge daıyn Lamanchalyq Don Kıhottyń muńdy beınesin somdaıtyn rytsar rólinde - Jánibek Imanqulov, onyń janqııar atqosshysy Sancho Pansa - Bostan Qojabekov. Bas toreador Espada partııasynda - Oljas Tarlanov alǵash óner kórsetedi. Kóshe bıshisi - Anastasııa Zaklınskaıa, Ámirshi drıada - Ásel Shaıkenova, Gúl satýshylar - Ásel Qusaıynova, Móldir Shákimova, Gamash - Rahmetýlla Naýanov, Lorentso - Janádil Beısembıev, Amýrchık - Gúlzıra Jantemir.
Kórnekti, qyzyqty spektakldiń tusaýkeseri óz kórermenderin aqqaınar sııaqty jandy shymyrlatatyn beıneli keıipkerlerimen, mýzykasymen, jasampaz oqıǵalar jelisimen, kóńildi ázilderimen, áserli ansambl bılerimen, bas aınaldyratyn tirený, sekirý jáne aınalý sııaqty bı áreketterimen jaýlap aldy.
Uıymdastyrýshylar atap ótkendeı, ataqty stsenograf Etsıo Frıdjerıonyń ǵajaıyp dekoratsııalary, «Oskar» syılyǵynyń laýreaty Franka Skýarchapınonyń sándi kostıýmderi, proektsııa jónindegi sýretshi Serdjıo Metallıdiń 3D-áserler men anımatsııalardy sátti qoldanýy elorda turǵyndary men qonaqtaryn qýantatyn bolady.
