Astanada «Dombyra party» jáne «poezııa túni» ótedi
ASTANA. 25 qarasha. QazAqparat - 28 qarashada QR Ulttyq akademııalyq kitaphanasynda «Jaýhar jyr planetasyna túngi saıahat» atty poezııa túni áleýmettik-mádenı aktsııa ótedi.
Bul týraly astana.kz saıtyna QR UAK habarlady.
Saǵat 18.00-22.00 aralyǵynda ótetin is-shara kórnekti, áserli «Kitaphana shaqyrady, poezııa shaqyrady» atty flesh-mobtan bastalady. Aktsııanyń jyr bóligi Qazaqstannyń halyq jazýshysy Farıza Ońǵarsynovanyń shyǵarmashylyǵyna arnalady. «Shańyraq» etnografııalyq zalynda Farıza Ońǵarsynovanyń týǵan jeri «Manash» aýyly qonady, al mýzykalyq meımanjaıda «Poezııa patshaıymy» kitap kórmesi, «Júrekterge bir jylý ákeleıin...» atty jyr keshi ótedi. Farıza Ońǵarsynovanyń lırıkasyna arnalyp «Tartynbaı sóıler asylmyn...» ádebı saıysy men «Qyrmyzy boıaýlar sóılesin...» taqyrybynda jas sýretshiler alleıasy bolady. Al Internet zalda qazaqstandyq ulttyq elektrondyq kitaphana men basqa saıttarda ornalasqan qazaqstandyq avtorlardyń shyǵarmalarymen tanysýǵa bolady.
Sondaı-aq, kelýshiler «Dombyra party» ataýymen ótetin dombyrashylar keshine jáne «Ádebı karaoke» mýzykalyq keshine qatysady. «KvartalEast-West» taqyryby aıasynda Úndistandy zerdeleý ortalyǵy, frantsýz, koreı kvartalynda bolyp, atalǵan elderdiń salt-dástúrleri men ádebı qyzyǵýshylyqtarymen tanysýǵa bolady. «Kórkem ádebıet abonementi» zalynda «Balalar eline saıahat» atty júzdesýde eń kóp oqıtyn oqyrmandy marapattaý ótedi.
Munymen qosa, kitaphana qorynan eń úlken kitap, eń kishkentaı kitap, eń sırek kitap, eń jańa kitap, t.b. usynylatyn «Eń, eń, eń...» kitap kórmesi uıymdastyrylady. Bul - kitaptardan jasalǵan «Shabyt baǵy» ınstallıatsııalyq kórmesi.
Kitaphananyń meımandary belgili adamdardyń «Kitaphana alleıasynda» fotosýretteri kórmesin tamashalaıdy. Sonymen birge nıet bildirgender túngi sholǵynshymen birge kitaphananyń eń qasterli jeri - kitap saqtaý qorynda bolyp, kitap patshalyǵynyń saltanatyn sezine alady.
Budan bólek, «Meniń qoltańbam» atty múmkindigi shekteýli oqyrmandardyń ózderi qoldan jasaǵan buıymdardyń kórmesi ashylady. Bilýge qumar jandar teleskop arqyly túngi qalany tamashalaı alady jáne «Poezııamen juldyz joramal» bóliminen oqyrmandar ózi týraly bile alady.
Poezııa merekesiniń sońy bı marafonymen jalǵasady.
