Astanada dinı ekstremızmniń qurbandary týraly spektakl kórsetiledi

ASTANA. QazAqparat - B. Momyshuly dańǵylyndaǵy Oqýshylar saraıynda alǵash ret «Esigimdi qaqqan kim?» spektakli sahnalanady. Pesa teris aǵym jetegine túsken jas otbasynyń máselesi jaıly áńgimeleıdi. Bul týraly qala ákimdiginiń saıty habarlady.

Shyǵarmanyń avtory jazýshy-dramatýrg, QR Parlamenti Senatynyń depýtaty Jabal Erǵalıev, spektakl onyń «Jan shyryly» romany boıynsha qoıylady.

-  Bul kórkem shyǵarma, onda qııal da, dálelder de bar, negizinen, qoǵamda oryn alǵan faktiler keltiriledi. Radıkaldy dinı aǵymdar Qazaqstanda tamyryn jaıyp keledi, jastarymyz olardyń yqpalyna túsip, keıbireýleri otbasylaryn alyp Sırııaǵa ketip jatyr. Bul bir halyqtyń, bir ulttyń ǵana máselesi emes. «Esigimdi qaqqan kim?» dep atalǵanymen, bul jerde júrek pen sana týraly aıtylǵan, - deıdi avtor.

Onyń aıtýynsha, shyǵarmany jazýǵa bir jyldan artyq ýaqyt jumsalǵan. Jazýshy qujattardy zerttep, terrorızmge qarsy organdardyń kómegine júgingen.

Q. Qýanyshbaev atyndaǵy qazaq mýzykalyq drama teatrynyń rejısseri, QR eńbek sińirgen qaıratkeri Nurlan Jumanııazov spektakldi eki aıdyń ishinde qoıǵan.

Drama qarapaıym qazaq otbasy týraly. Asqar men Gúlnur atasy men ájesiniń qolynda ósip jatqan qyzdaryna bir jyldan astam ýaqyttan beri barmaıdy. Buǵan olardyń teris dinı aǵymdy ustanatyny sebep bolady. Jastar jaǵdaıdyń mán-jaıyn tek qyzdarymen birge sheteldegi terrorıster lagerine túskende ǵana túsinedi. Biraq olar ol jerden shyǵa almaı qalady.

Spektakl azamattardy beıbitshilikti, otanymyzdy jáne otbasymyzdy baǵalaýǵa, sondaı-aq, basty keıipkerlerdiń qateligin qaıtalamaýǵa shaqyrady.  Spektakl 17 qazanda saǵat 19-da bastalady.