Astanada dinı ádebıetti taratýǵa arnalǵan 8 arnaıy turaqty úı-jaı belgilendi
ASTANA. 4 qazan. QazAqparat - Astana prokýratýrasy Qazaqstan Respýblıkasy «Dinı qyzmet jáne dinı birlestikter týraly» Zańynyń buzylmaýyna basty nazar aýdarady, dep habarlaıdy elordanyń baqylaý organynyń baspasóz qyzmeti.
Osy máselege oraı Astana prokýratýrasy halyqqa úndeý jarııalady. QazAqparat osy qujattyń tolyq mátinin taratady.
Ú N D E Ý
Zańdylyqty qamtamasyz etý, quqyq buzýshylyqtardyń
aldyn alý maqsatynda
(QR «Prokýratýra týraly» Zańynyń 25-2 talabyna sáıkes)
Qazaqstan Respýblıkasy «Dinı qyzmet jáne dinı birlestikter týraly» Zańynyń (budan ári - Zań) 9-babyna sáıkes dinı ádebıetti, dinı mazmundaǵy ózge de aqparattyq materıaldardy, dinı maqsattaǵy zattardy tek qana ǵıbadat úılerinde (ǵımarattarynda), dinı bilim berý uıymdarynda, sondaı-aq oblystardyń, respýblıkalyq mańyzy bar qalalardyń jáne astananyń jergilikti atqarýshy organdary arnaıy belgilegen turaqty úı-jaılarda taratýǵa jol beriledi.
Zańnyń 5-baby 4-tarmaǵyna sáıkes Astana qalasy ákimdiginiń 31.07.2012 jylǵy 31 shildedegi №111-1076 qaýlysymen dinı ádebıetti jáne dinı mazmundaǵy ózge de aqparattyq materıaldardy, dinı maqsattaǵy zattardy taratý úshin 8 arnaıy turaqty úı-jaıdyń tizimi bekitilgen. Olar:
«Kúltegin» dúkeni, Abylaı han dańǵyly, №6/1;
«KıK» dúkeni, Abylaı han dańǵyly, №29/1;
«Voronenko I.M.» JK, Abaı dańǵyly, №89;
«Abaı» dúkeni, Á.Bókeıhan kóshesi, №30;
«Káýsar» dúkeni, Beıbitshilik kóshesi, №69;
«Almaty» dúkeni, Abaı dańǵyly, №39;
«Knıjnyı Eldorado» dúkeni, Beıbitshilik kóshesi, №31;
«Eldorado» dúkeni, D.Qonaev kóshesi, №35/1.
Dinı ádebıetti, dinı mazmundaǵy ózge de aqparattyq materıaldardy, dinı maqsattaǵy zattardy zańmen qarastyrylmaǵan jerlerde taratýǵa tyıym salynady.
Qoldanystaǵy zańnamada dinı qyzmet jáne dinı birlestikter týraly zańnamany buzǵany úshin (ÁQK 375-baby 1-bóligi) jeke tulǵalarǵa - elý aılyq eseptik kórsetkish mólsherinde, laýazymdy adamdarǵa jáne dinı birlestikterdiń basshylaryna - júz aılyq eseptik kórsetkish mólsherinde, zańdy tulǵalarǵa qyzmetin úsh aı merzimge toqtata turyp, eki júz aılyq eseptik kórsetkish mólsherinde aıyppul salý kózdelgen.
Osyǵan oraı, din salasyndaǵy zańdylyqty qamtamasyz etý jáne quqyq buzýshylyqtardyń aldyn alý maqsatynda Qazaqstan Respýblıkasy «Dinı qyzmet jáne dinı birlestikter týraly» Zańynyń talaptaryn buzýǵa bolmaıtynyn nazarlaryńyzǵa salamyz.
