Astanada dinbasylardyń kezekti basqosýy ótip jatyr

ASTANA. QazAqparat - Astanada Álemdik jáne dástúrli dinder kóshbasshylary sezi hatshylyǵynyń XVI otyrysy bastaldy, dep habarlaıdy QazAqparat tilshisi.

Otyrys barysynda Álemdik jáne dástúrli dinder kóshbasshylarynyń kezekti sezine daıyndyq sharalary pysyqtalmaq. Atap aıtqanda, sezdiń naqty ýaqytyn belgileý kózdelip otyr. Buǵan deıin VI sezdi 2018 jyly ótkizý týraly jospar bolǵan. Alaıda atalǵan sharanyń naqty merzimi belgilenbedi. Sondaı-aq, búgingi otyrysta dinaralyq dıalogqa qosqan úlesi úshin «Astana» halyqaralyq syılyǵy men Álemdik jáne dástúrli dinder kóshbasshylary seziniń Qurmet medaline usynylǵan úmitkerler máselesi talqylanatyn bolady.

  

Búgingi otyrysqa Ál-Azhar Joǵarǵy ımamynyń syrtqy baılanystar jónindegi keńesshisi Ábdilrahman Musa, Dúnıejúzilik Islam lıgasy Bas hatshysynyń keńesshisi Mýnkız As-Sakar, Saýd Arabııasy Koroldigi Islam, vakýfter jáne úndeý isteri jónindegi mınıstriniń keńesshisi Abdýlla ıbn Fahd ál- Lhıdan, Iran Islam Respýblıkasynyń mádenıet jáne ıslamdyq baılanystar jónindegi uıym prezıdentiniń orynbasary Gahraman Soleımanı, Islamabad halyqaralyq ıslam ýnıversıteti Islamdy zertteý ınstıtýtynyń bas dırektory Muhammad Zııa Ýl-Hak, «Nur-Múbárak» Mysyr Islam ýnıversıtetiniń rektory Goýda Basıýnı, Frantsııa metropolıti Emmanýıl Adamakıs, Armıan Apostol shirkeýiniń ýkraındyq eparhııasynyń jetekshisi Margos Oganesıan, Bedford epıskopy Rıchard Atkınson, sondaı-aq Qazaqstandaǵy dinbasshylar men osy saladaǵy sheneýnikter qatysýda.