Astanada Dınara Sádýaqasovanyń shahmat akademııasy ashyldy
ASTANA. QazAqparat - Astanada Qazaqstannyń tanymal shahmatshysy, shahmattan birneshe dúrkin álem chempıony, halyqaralyq grossmeıster Dınara Sádýaqasovanyń shahmat akademııasy ashyldy, dep habarlaıdy QazAqparat tilshisi.
«Bul akademııanyń ashylýy - ózim úshin jáne barlyq komandamyz úshin aıtýly oqıǵa. Árıne, akademııanyń negizgi maqsaty - shahmat oıynyn Qazaqstanda nasıhattaý. Astana men Almatyda sheberlik synyptaryn ótkizdim jáne Tuńǵysh Prezıdent qorynyń qoldaýymen Atyraý, Shymkent, Qyzylorda óńirlerine bardym», - dep atap ótti Dınara Sádýaqasova resmı ashylý rásiminde.
Sonymen birge, akademııanyń ashylý saltanatyna QR Syrtqy ister mınıstri Qaırat Ábdirahmanov, bokstan Olımpıada chempıony Serik Sápıev, QR Shahmat federatsııasynyń basshylyǵy, Qazaqstandaǵy ıÝNISEF ókildigi, tanymal qoǵam qaıratkerleri qatysty.
«Qazaqstannyń naǵyz ókiletti elshileri - chempıondar. Sporttaǵy, mádenıet pen ónerdegi chempıondar. Biz Prezıdenttiń tapsyrmasyn oryndaımyz, syrtqy saıası bastamalardy júzege asyrýǵa jan salamyz. Bizdiń bul dıplomatııalyq jumysymyzda sportshylar barlyq esikterdi ashyp beredi. Bizdiń elimizdi Prezıdent pen chempıondar arqyly tanıdy. Shahmat - álemniń barlyq elinde qoldaý tapqan sport», - deıdi QR Syrtqy ister mınıstri Qaırat Ábdirahmanov.
Aıta ketý kerek, 2019 jyly Dınara Sádýaqasovanyń shahmat akademııasy Atyraý qalasynda ashylady. Onda áleýmettik az qamtylǵan otbasynyń balalary, jetimder men múmkindigi shekteýli balalar tegin oqıdy.
Al sáýir aıynda Dınara Sádýaqasova stýdentter arasynda shahmattan respýblıkalyq týrnır ótkizedi. 
