Astanada dezınsektsııalyq jumystyń tórtinshi kezeńi bastaldy
ASTANA. KAZINFORM - Astanada masa men shybyn-shirkeıge jáne basqa da jándikterge qarsy aýqymdy dezınsektsııalyq jumys jalǵasyp jatyr. Olar eki aýysymda júrgiziledi, dep jazdy elorda ákimdiginiń resmı saıty.
Atalǵan dezınsektsııalyq is-sharalar jándikterdiń sanyn azaıtýǵa baǵyttalǵan. Jumystar túngi ýaqytta – saǵat 21:00-den 04:00-ge deıin júrgiziledi jáne ár kezeń 20 kúnge sozylady. Barlyǵy 6 kezeńge josparlanǵan, qazir tórtinshi kezeń ótip jatyr.
Qala aýmaǵynda dezınsektsııa jumysyn júrgizý úshin mehanıkalyq rotorly búrikkishter, dezınsektsııalyq mashınalar, qamysty ósimdigi bar jetýi qıyn jerlerdi óńdeýge arnalǵan kvadrokopterler, al iri sý aıdyndarynda arnaıy jabdyqtalǵan qaıyqtar qoldanylady.
Aýqymdy óńdeý barysynda basqarýshy kompanııalar, PIK, MIB (turǵyn úı qoryn basqaratyn uıymdar), bilim berý, densaýlyq saqtaý, mádenıet, sport, qurylys nysandary, bazarlar, saýda úıleri jáne basqa da mekemeler jertóle jaılaryn abattandyrý, qurǵatý jáne dezınsektsııalyq óńdeý arqyly bul is-sharalarǵa belsene qatysýy tıis. Dezınsektsııa sharalary kezinde saqtyq sharalaryn saqtaý mańyzdy:
• Óńdeletin aýmaqqa barýdy shekteý;
• Óńdeý kezinde terezelerdi jabý.
Sonymen qatar Astanada kemirgishterge qarsy kúres júrgizilip jatyr. Deratızatsııalyq is-sharalar jylyna eki maýsymda – kóktemde jáne kúzde ótedi.
Sanıtarlyq normalarǵa sáıkes, 2025 jylǵy kóktemgi maýsym – 21 sáýir men 18 mamyr aralyǵynda júrgizildi. Kúzgi kezeńdi qyrkúıek aıynyń ortasynan qazanǵa deıin bastaý josparlanyp otyr.
Qazir daıyndyq jumysy júrip jatyr. Óńdeý jeke sektordy (turǵyn úı alaptary) jáne ashyq aýmaqtardy (saıabaqtar, ózen arnalary, sý aıdyndary, kanaldar, zırattar) qamtıdy. Jeke sektor turǵyndaryna arnaıy ýlaǵysh jemder tegin taratylady, sondaı-aq ornynda qaýipsizdik jóninde nusqaýlyq beriledi. Mundaı is-sharalar kemirgishter sanyn azaıtýǵa jáne asa qaýipti juqpaly aýrýlardyń taralýynyń aldyn alýǵa baǵyttalǵan.
Buǵan deıin Qonaevta masalarǵa qarsy dezınsektsııalyq óńdeý jumystary bastalǵanyn jazǵan bolatynbyz.