Astanada derekti kıno kúnderiniń esigi ashyldy
ASTANA. QazAqparat - Astanada «Ǵasyrlar ańsaǵan azattyq» derekti kıno kúnderi ótkizilýde.
«1 jeltoqsanda derekti kıno kúnderi rejısser Rashıd Súleımenovtiń «Qazaqstan joly: Táýelsizdik shejiresi» tsıklinen «Memleket basshysy» jáne «Elbasy» atty fılmderiniń kórsetilimimen bastaldy», - dep atap ótilgen QR Mádenıet jáne sport mınıstrliginiń taratqan aqparatynda.
«Qazaqstan joly: Táýelsizdik shejiresi» atty kóp serııaly derekti fılm memleket tarıhyndaǵy eń jarqyn oqıǵalardyń saraptamasy, halyq ómiriniń barlyq salalary reformalanýyndaǵy Qazaqstan Respýblıkasy Tuńǵysh Prezıdentiniń róli men Memleket basshysynyń álemdik kólemdegi jahandyq jobalardyń bastamashysy retindegi jetistikteri týraly baıandaıdy.
Sonymen qatar shara aıasynda Qazaqstan kórnekti qaıratkerleriniń ómiri men shyǵarmashylyǵyna arnalǵan derekti fılmderdiń tusaýkeserleri ótkizildi. Bul fılmderdiń qatarynda rejısser B. Núsipbekovtyń «Sháken Aımanov: adam jáne ańyz», rejısser J. Jetirýovtyń «Myrzataı Joldasbekov» jáne D. Salamattyń «Nurlan Orazalın» kınolentalary bar.
Fılmderdiń kórsetilimderi L. N. Gýmılev atyndaǵy Eýrazııa ulttyq ýnıversıtetiniń kınoteatrynda jáne Qazaq ulttyq óner ýnıversıtetiniń Jambyl atyndaǵy zalynda ótedi.
«Qazaqstan Respýblıkasynyń Tuńǵysh Prezıdenti kúniniń aıasynda ótip jatqan sharanyń uıymdastyrýshylary «Qazaqfılm» AQ, Gýmılev atyndaǵy Eýrazııa ulttyq ýnıversıteti, Qazaq ulttyq óner ýnıverstıteti bolyp tabylady», - delingen mınıstrlik málimetinde.
