Astanada densaýlyq saqtaý sektorynda ınstıtýtsıonaldy reformalardy júzege asyrý jobasy qorytyndylandy
ASTANA. QazAqparat - Búgin Astanada «Qazaqstan Respýblıkasy densaýlyq saqtaý sektorynda ınstıtýtsıonaldy reformalardy júzege asyrý jáne tehnologııalardy taratý» jobasyn júzege asyrý barysy týraly» qorytyndy konferentsııa ótti.
«Bul joba keshendi joba, sebebi 7 bólim men 13 tarmaqshadan turady. Bul bólimderdiń barlyǵy ortaq maqsatqa jetý úshin ózara baılanysqan. Negizgi maqsat - sheteldik konsaltıng kompanııalary men densaýlyq saqtaý jáne áleýmettik damý mınıstrligi arasynda ózara tıimdi áriptestik ornatý», - dedi jobanyń ulttyq úılestirýshisi Bolat Tákejanov.
Onyń aıtýynsha, jobany júzege asyrýdyń nátıjesinde Qazaqstannyń densaýlyq saqtaý júıesine halyqaralyq standarttar engizilip, uzaq merzimdi ınstıtýtsıonaldy potentsıal qalyptasqan.
Jalpy, 16-20 qarasha aralyǵynda Qazaqstan men Dúnıejúzilik banktiń jobalaý toptary, Kanada, AQSh, Fınlıandııa, Ispanııa jáne ózge elderdiń sarapshylary jobanyń barlyq jeti bólimine taldaý jasaıdy.
