Astanada densaýlyq saqtaý salasynda ınstıtýtsıonaldyq reformalar júrgizý máselesine arnalǵan dóńgelek ústel otyrysy ótti
ASTANA. 9 qarasha. QazAqparat - Búgin Astanada Densaýlyq saqtaý mınıstrligi men Dúnıejúzilik banktiń uıymdastyrýymen «Qazaqstan Respýblıkasynyń densaýlyq saqtaý salasynda ınstıtýtsıonaldyq reformalar júrgizý jáne tehnologııalar berý» jobasyn júzege asyrýǵa arnalǵan dóńgelek ústel otyrysy bolyp ótti.
Otyrysqa Parlament depýtattary men Prezıdent Ákimshiliginiń, múddeli mınıstrlikter men vedomstvolardyń, halyqaralyq uıymdardyń ókilderi qatysty. Joba Qazaqstan Respýblıkasynyń Úkimeti jáne Dúnıejúzilik banktiń seriktestik strategııasy aıasyndaǵy birlesken bastamasy bolyp tabylady. Joba 2008-2015 jyldar aralyǵyna josparlanǵan. Jobany júzege asyrýshy - Qazaqstan Respýblıkasynyń Densaýlyq saqtaý mınıstrligi. Jıynǵa qatysýshylar jobanyń túrli qosalqy quramdary boıynsha júzege asyrýdyń aralyq nátıjelerin, «Salamatty Qazaqstan» memlekettik baǵdarlamasy aıasynda qoldaýdyń ári qaraıǵy baǵyttaryn talqylady.
Qazirgi ýaqytqa deıin jobany júzege asyrý aıasynda densaýlyq saqtaý reformalarynyń ornyqtylyǵyn qamtamasyz etý úshin ınstıtýtsıonaldy qurylymdar jasaqtaldy. Olar óz kezeginde tehnologııalar berý jónindegi konsaltıngtik kompanııalarmen seriktestik is-áreket negizinde densaýlyq saqtaý júıesiniń tıimdiligi men sapasyn arttyrý, medıtsınalyq bilim berý jáne klınıkalyq tájirıbege halyqaralyq standarttar engizý tetikteri, ambýlatorııalyq qamtamasyz etý tıimdiligin arttyrý, tamaq ónimderi qaýipsizdigin qadaǵalaý tetikterin kúsheıtý, zańnamany úndestirý máseleleri boıynsha birlesip jumys isteýde. Jobany júzege asyrý aıasynda elimizdiń mamandary halyqaralyq konferentsııalar men sımpozıýmdarǵa qatysýda. Bul Qazaqstannyń halyqaralyq qoǵamdastyqpen belsendi yqpaldasýyna yqpal eteri sózsiz.
