Astanada densaýlyq saqtaý salasy qyzmetkerleri jetistikteriniń kásibı kórmesi ashyldy
ASTANA. 12 jeltoqsan. QazAqparat - Búgin Astanadaǵy «Nazarbaev ortalyǵynda» Memlekettik «Salamatty Qazaqstan» baǵdarlamasyn júzege asyrý men densaýlyq saqtaý salasy qyzmetkerleri jetistikteriniń kásibı kórmesi ótti.
Іs-shara QR densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» Memlekettik baǵdarlamasynyń basty mindetteri sheńberinde uıymdastyryldy.
Astana qalasy Densaýlyq saqtaý basqarmasy bastyǵynyń orynbasary Sáýle Qurmanova, kórme jastar arasynda medıtsına kásibin keńinen tanystyrý, eldegi medıtsına deńgeıi týraly qoǵamdyq oń pikirdi qalyptastyrý, ár azamattyń óz densaýlyǵyna degen muqııat jaýapkershilikti arttyrýdy kózdeıtinin erekshe atap ótti.
«Astanada 9 emhana, 14 aýrýhana, 2 klınıkalyq oqytý ortalyǵy, sonymen qatar Salaýatty ómir saltyn saqtaý ortalyǵy men dárihanalar, tis emhanalary barlyǵy 33 medıtsınalyq mekeme bar. Biregeı ozyq tehnologııalarmen jabdyqtalǵan jańa klınıkalardyń arqasynda búginde Astana qalasynyń medıtsınalyq qyzmet kórsetý deńgeıi bıikke kóterildi. Bizdiń azamattar shet memleketterge shyqpaı-aq, barlyq em túrlerin Qazaqstanda da ala alady», - dedi S.Qurmanova.
Birtutas aqparattyq ári kórmelik keńistiktiń biregeı formaty kelýshiler nazaryna otandyq medıtsına salasynyń jetistikteri jáne sońǵy jańalyqtarymen tanysýǵa jol ashady. Kórme barysynda medıtsına qyzmetkerleri óz mekemeleriniń qyzmeti týraly konsýltatsııa berip otyrdy. Kelýshiler foto- jáne beınematerıaldar arqyly da qoljetimdi zamanaýı medıtsına qyzmeti týraly barynsha tolyq aqpar alýǵa múmkindik aldy.
Sharany QR Densaýlyq saqtaý mınıstrligi men Astana qalasy Densaýlyq saqtaý basqarmasynyń qoldaýymen, Qazaqstannyń Azamattyq Alıansy uıymdastyrdy.
