Astanada densaýlyq saqtaý máseleleri boıynsha úılestirý otyrysy ótti
ASTANA. QazAqparat - Astanada ákimniń orynbasary E.Amanshaevtyń tóraǵalyǵymen Densaýlyq saqtaý máseleleri jónindegi úılestirý keńesiniń kezekti otyrysy ótti, dep habarlady astana.gov.kz.
Keńes barysynda elorda boıynsha densaýlyq saqtaý salasyndaǵy negizgi problemalar qaraldy, olardyń qatarynda halyqtyń shaǵymdaný deńgeıiniń joǵarylyǵy, medıtsına uıymdarynda kórsetiletin qyzmet sapasynyń tómendigi, astanadaǵy jedel járdem qyzmetiniń nashar jumys isteýi, dári-dármekterdiń jetispeýi jáne t.b. kóptegen máseleler bar.
Sońǵy bes jylda Astana halqy 150 myńnan astam adamǵa artty, 2015 jyldyń 1 qańtaryndaǵy jaǵdaı boıynsha 850 410 adamdy quraıdy. Jyl saıyn qala halqy 35-40 adamǵa artyp otyrady. Sáıkesinshe, 2020 jylǵa qaraı astana turǵyndarynyń sany bir mıllıonnan asady dep boljaýǵa bolady.
Sondyqtan qalanyń densaýlyq saqtaý júıesindegi shıelenistiń basty sebepteriniń biri densaýlyq saqtaý nysandarynyń, ásirese ambýlatorııalyq-emhana sektorynda materıaldyq jáne kadr qýattarynyń halyqtyń ósý qarqynyna sáıkes kelmeýinde bolyp tabylady.
Sońǵy bes jyl ishinde birqatar densaýlyq saqtaý nysandarynyń, onyń ishinde emhanalardyń salynǵanyna qaramastan, olardyń kópshiligi burynǵysynsha kóp júktememen jumys jasaıdy. Mysaly, bir aýysymda 500 patsıenttiń kelýine eseptelgen № 8 qalalyq emhana 67 myń adamǵa qyzmet kórsetýi kerek, al is júzinde bir aýysymda 644 patsıentti qabyldaıdy.
Qýaty osyǵan uqsas № 6 qalalyq emhana 84,5 myń adamǵa qyzmet kórsetedi, bir aýysymda 654 aýrýdy qabyldaıdy.
Onyń ishinde organdardy aýystyrǵannan keıin aýrýlardyń sany 48-den 110-ǵa deıin, onkologııalyq aýrýlar sany - 1057-den 1125-ke deıin ósti, atalǵan baǵdarlamany 1,4 mlrd. teńge mólsherinde qarjylandyrǵan jaǵdaıda 1,2 mlrd. teńge tapshylyǵy qazirdiń ózinde seziledi. Bes jyl ishinde qalanyń densaýlyq saqtaý salasyn qarjylandyrý kólemi 12,7 mlrd. teńgeden 31,6 mlrd. teńgege deıin ósti.
Budan bólek, qaladaǵy týý kórsetkishi de ósip keledi. Bes jyl ishinde bul kórsetkish 1000 adamǵa 24,5 -dan (16 444 abs.) 29-ǵa deıin ósti, (24 487 abs.) Qala turǵyndarymen qatar Astanada bosanǵysy keletin basqa qalalardan kelgen áıelder sany da artýda. Aýrýǵa qatysty da osyǵan uqsas jaǵdaı oryn alǵan, shekaralas oblystardyń turǵyndary emdelý úshin qala statsıonarlaryn tańdaǵandyqtan, emhanalardaǵy kezekter men turǵyndardyń aryzdary men narazylyǵy eń basty sebep bolyp tabylady.
Qalalyq jedel járdem stantsııalarynda jedel járdem mashınalarynyń jetispeýine baılanysty shıelenisti jaǵdaı oryn alǵan, qolda tıisti 85 mashınanyń ornyna bolǵany 56 mashına jumys jasaýda. Barlyq kórsetilgen máseleler boıynsha olardy qysqa merzimde sheshý boıynsha is-qımyl josparyn jasaý tapsyryldy.
Otyrys barysynda jaraqattanýshylyqtyń aldyn alý máselesi qarastyryldy. Aǵymdaǵy jyly Astanada jol-kólik oqıǵasyna baılanysty 604 oqıǵa tirkeldi, munda 699 adam zardap shekti, sonyń ishinde kámeletke tolmaǵandar sany - 108.
Atalǵan máseleniń ózektiliginiń zor ekenin eskere otyryp, Astana ákimdigi Astana qalasy boıynsha 2015-2017 jyldarǵa arnalǵan jaraqattan, ýlanýdan jáne jazataıym jaǵdaılardan bolatyn ólim-jitimdi azaıtý jónindegi vedomstvoaralyq is-sharalar josparyn bekitti.
Jaraqattylyqty azaıtý jónindegi vedomstvoaralyq josparǵa sáıkes atqarylǵan is-sharalar men ony oryndaý boıynsha ári qaraıǵy jumys barysy týraly baıandamalar tyńdaldy.
Budan bólek, mektep medıtsınasyn Bilim berý basqarmasynan Densaýlyq saqtaý basqarmasy vedomstvosyna berý máselesi qaraldy. Mektep medıtsınasyn berý boıynsha naqty mindetter belgilenip, aǵymdaǵy jaǵdaıǵa taldaý jasaldy. Sondaı-aq, oqýshylarǵa profılaktıkalyq jáne medıtsınalyq qyzmet kórsetý sapasyn arttyrý, sonymen qatar balalardy týǵan sátinen bastap 17 jasqa jetkenge deıin baqylaýdyń sabaqtastyǵy men úzdiksizdigin qamtamasyz etý máselesi kóterildi. Bul, bárinen de buryn, mekteptegi medıtsına qyzmetkeriniń róli men bedelin kóterýge múmkindik beredi, ol óziniń eńbeginiń nátıjesin kórýge yntalanady.
