Astanada densaýlyq saqtaý boıynsha halyqaralyq úzdik IT jobalar anyqtalady
ASTANA. QazAqparat - Elordada 25-26 qazan aralyǵynda densaýlyq saqtaýdy damytý men sala boıynsha tsıfrlyq, ınnovatsııalyq jobalardy tanystyratyn «Astana Digital Health» atty halyqaralyq IT kórme ótedi, dep habarlaıdy QazAqparat tilshisi.
«Astana Digital Health» kórmesi alǵashqy medıtsınalyq-sanıtarlyq kómektiń tsıfrlyq tehnologııasyn transformatsııalaýǵa arnalǵan jańa jáne ozyq tehnologııalardy kórsetýge tamasha múmkindik beredi. Uıymdastyrýshylardyń aıtýynsha, atalǵan sharaǵa medıtsına salasyndaǵy álemniń jetekshi uıymdary men densaýlyq saqtaý mamandary shaqyrylyp otyr.
«Qazir ózderińiz biletindeı, IT startap jobalar arqyly kóptegen jańa dúnıeler júzege asyrylýda. Soǵan baılanysty biz de sala mamandarynyń basyn biriktirip medıtsınany odan ári damytýda qandaı joba, ıdeıalary bar, solardy ortaǵa salyp talqylaýdy jón kórdik. Onyń ishinde densaýlyq saqtaý salasyn tsıfrlandyrýǵa kóshirý men onyń medıtsınaǵa beretin mańyzyn anyqtaýdy kózdep otyrmyz. ıAǵnı, tsıfrlandyrý, IT jobalardyń densaýlyq saqtaý salasyna qandaı paıdasyn tıgize alatynyn saralap, úzdik dep tanylǵan jobalardy óz elimizde iske asyrmapqpyz», - dedi QR Densaýlyq saqtaý vıtse-mınıstri Oljas Ábishev OKQ-de ótken baspasóz máslıhatynda.
Onyń aıtýynsha, IT kórmede densaýlyq saqtaý salasy qyzmetkerleriniń aqparattyq-kommýnıkatsııalyq tehnologııalardyń kómegimen jasalǵan ónimderi men qyzmetteri kórsetiledi.
Aıtýly sharaǵa álemdegi IT salasy áldeqaıda kóshilgeri damyǵan AQSh, Koreıa sekildi 10 eldiń ókilderinen quralǵan 200 komanda qatysady, onyń 15-i óz elimizden. Kórme sońynda úzdik startap jobalar anyqtalyp, 1 orynǵa 600 myń teńge, 2 orynǵa 400 myń teńge, 3 orynǵa 200 teńge kóleminde syıaqy tabystalady.
QR Densaýlyq saqtaý mınıstrliginiń bastamasymen jáne aımaqtyq densaýlyq saqtaý ortalyqtary, ıÝNISEF jáne «A1» JShS kómegimen uıymdastyrylatyn «Astana Digital Health» halyqaralyq IT kórmesi elordadaǵy QR Ulttyq mýzeıinde ótedi.
Buǵan deıin habarlaǵanymyzdaı, 2019 jyldan bastap elimizdegi barlyq densaýlyq saqtaý mekemelerindegi qyzmet kórsetý qaǵazbastylyqtan arylyp tolyǵymen elektrondy formatqa kóshetin bolady.
