Astanada «Densaýlyq aptasy» ótýde
ASTANA. 7 qyrkúıek. QazAqparat - Elimizdiń barlyq mektepterinde «Kúndelikti dene qımylynyń belsendiligi - densaýlyq pen uzaq ómir súrýdiń joly!» uranymen «Densaýlyq aptasy» jalǵasýda.
Aktsııa sheńberinde Astana qalasyndaǵy №22 orta mektepte voleıboldan «Altyn dop» birinshiligi ótkizildi. Týrnırge ózge komandalarmen qosa, Qazaqstan Respýblıkasy Densaýlyq saqtaý mınıstrliginiń qyzmetkerlerinen quralǵan, QR DSM Sanıtarlyq-epıdemıologııalyq qadaǵalaý komıteti tóraǵasynyń orynbasary Nurqan Sádýaqasov jetekshilik etken komanda da qatysty.
Jarys qorytyndysynda Densaýlyq saqtaý mınıstrliginiń komandasy ekinshi orynǵa ıe boldy.
Bul birinshilik elimizdiń maqtanyshyna aınalǵan Olımpıada oıyndarynyń jeńimpazdary qurmetine arnaldy.
Sonymen qatar, aktsııa aıasynda óskeleń urpaq arasynda dene shynyqtyrý belsendiligi, sportpen aınalysý, durys tamaqtaný sııaqty densaýlyq mádenıetin qalyptastyrý boıynsha mektep oqýshylarymen áńgime júrgizildi.
«Densaýlyq aptasy» aktsııasy búgin «Ulttyq sport jáne ústelústi oıyndary kúni», al erteń 8 qyrkúıek - «Sporttyq otbasy jáne salaýatty pedagogıkalyq ujym kúni» taqyryptarymen ótedi.
