Astanada densaýlyq aktsııasy tamyzdyń sońyna deıin jalǵasady
ASTANA. QazAqparat - «Salamatty Qazaqstan» memlekettik baǵdarlamasyn iske asyrý maqsatynda aımaqtardyń aýyl turǵyndaryna arnalǵan 2011-2015 jyldar aralyǵynda «Densaýlyq joly» aktsııasy ótkizilip jatyr. Aktsııa shildeniń 1-inen tamyzdyń sońyna deıin jalǵasady, dep habarlaıdy astana.kz
Sharanyń maqsaty - qoǵamnyń, memlekettik jáne memelekettik emes uıymdardyń nazaryn aýyl turǵyndarynyń densaýlyǵyn qorǵap, nyǵaıtý máselelerine aýdarý, aýyl turǵyndaryna salaýatty ómir saltyn qalyptastyrý jáne áleýmettik mańyzdy aýrýlardyń aldyn alý suraqtary boıynsha aqparattyq bilim berý men praktıkalyq kómek kórsetý. Aktsııa aıasynda «Kırovskaıa» otbasylyq dárigerlik ambýlatorııasy Saryarqa aýdanynyń turǵyndary úshin aktsııa ótkizdi. Apta boıy kelýshilerdiń bári konsýltatsııa aldy. Budan bólek, alǵashqy medıtsınalyq-sanıtarlyq kómek dárigerleri de týberkýlez aýrýyn erte anyqtaý jáne profılaktıkalyq sharalardy kúsheıtý boıynsha konsýltatsııadan ótti. Aktsııaǵa týberkýlez dertin emdeý dıspanseriniń mamandary, qalanyń medıtsınalyq uıymdarynyń dárigerler brıgadasy, salaýatty ómir saltyn qalyptastyrý ortalyǵynyń mamandary atsalysty.
