Astanada demalys saıyn mektep taýarlarynyń jármeńkesi ótedi

ASTANA. QazAqparat – 12 tamyzdan bastap Astananyń barlyq aýdandarynda balalardy mektepke daıyndaý úshin jármeńkeler uıymdastyrylady. Bul týraly qalalyq Bilim basqarmasynyń basshysy Qasymhan Senǵazyev Astana kommýnıkatsııalar ortalyǵynda aıtty, dep habarlaıdy QazAqparat tilshisi.

Astana qalasynyń aýdan ákimdikteri ınvestıtsııalar jáne kásipkerlikti damytý basqarmasymen birlesip, tamyz aıynyń demalys kúnderi Baıqońyr aýdanynda «Aımaqtaý» saýda ortalyǵy, Nura aýdanynda – tsırk turaǵy; Saryarqa aýdanynda – Sh. Qosshyǵululy kóshesi, 14-úı mańynda, Almaty aýdanynda – Abylaı han kóshesi, 20-úı mańynda, Esil aýdanynda – Botanıkalyq saıabaq turaǵynda mektep jármeńkesin ótkizýdi josparlap otyr. Qazirgi ýaqytta atalǵan jármeńkelerge daıyndyq jumystary júrip jatyr

, - dedi basqarma basshysy.

Buǵan deıin Qasymhan Senǵazyev «Mektepke» jol aktsııasy aıasynda 22 myńnan astam balaǵa kómek kórsetiletinin aıtqan edi. Atap aıtqanda, Astanada jaǵdaıy tómen otbasy balalaryna 41 myń teńgeden beriledi. Bul kómekti alý úshin ata-analar mektepke júginýi qajet.

Aıta keteıik, bıyl jańa oqý jylynda Astanada 255 myń bala bilim alady. Birinshi synypqa 27 myńnan astam bala barady dep kútilip otyr.

Sondaı-aq, Astananyń bilim basqarmasy qala turǵyndarynan mektepke sebepsiz barmaıtyn balalar týraly habarlaýdy surady jáne tıisti reıd júrgizip jatyr.