Astanada demalys kúnderi 24 oıyn-saýyq mekemesi karantındi buzǵan

NUR-SULTAN. QazAqparat – Polıtsııa qyzmetkerleri men ákimdik jáne sanıtarlyq-epıdemıologııalyq qyzmet ókilderinen qurylǵan mobıldi toptar qalada karantın rejımin buzý faktilerin anyqtaý sharalaryn jalǵastyryp jatyr, dep habarlaıdy QazAqparat Nur-Sultan qalasynyń polıtsııa departamentiniń baspasóz qyzmetine silteme jasap.

Osylaısha, ótken demalys kúnderi mobıldik top kásipkerliktiń 150-ge jýyq sýbektisin tekserip shyqty. Tekserý kezinde karantındi buzǵan 24 nysan anyqtalǵan.

Pýshkın kóshesinde ornalasqan «ZARA» túngi klýby jumys isteýge tyıym salynǵanyna qaramastan, túngi saǵat 23:45-te kelýshilerdi qabyldap jatty.

Tekserý kezinde onyń ishinde shamamen 100 adam júrgen. Sol kúni Turan dańǵylyndaǵy «Fest425» dámhanasyn tekserý kezinde onyń ishinde 50 adamnyń kóńil kóterip júrgeni anyqtaldy.

Budanbasqa, mekemede kalıan qyzmeti usynylǵan. Polıtsııa qyzmetkerleri kelýshiler jáne dámhana kalıanshysyna qatysty QR Ákimshilik quqyq buzý kodeksiniń 441-baby boıynsha ákimshilik hattama toltyrdy.

Qabanbaı batyr dańǵylynda ornalasqan «INCOGNITO» karaoke zaly kelýshilerdi tańǵy saǵat 05:00-de qabyldap jatty. Tekseris kezinde onyń ishinde 80-ge jýyq adam júrgen.

Mekeme ıelerine qatysty jınalǵan materıal QR Ákimshilik quqyq buzý kodeksiniń 425-baby boıynsha ákimshilik óndiristi qozǵaý úshin ókiletti organǵa joldandy.

Jyldyń basynan beri karantın rejıminiń shekteý sharalary kezeńinde mobıldik top 580-nen astam buzýshylyqty anyqtaǵan.

Nur-Sultan qalasynyń polıtsııa departamenti kásipkerlerge karantın buzǵany úshin jaýapkershilik bar ekenin eskertip, sanıtarlyq normalardy saqtaýǵa shaqyrady.