Astanada demalys kúnderi ótetin jármeńkede eki oblystyń fermerleri ónimderin usynady

ASTANA. KAZINFORM – Elordada 6-7 qyrkúıek aralyǵynda Jambyl jáne Ulytaý oblystarynyń taýar óndirýshileriniń qatysýymen óńirlik aýyl sharýashylyǵy jármeńkesi ótedi, dep jazdy qala ákimdiginiń resmı saıty.

Jármeńkede Jambyl jáne Ulytaý oblystarynyń sharýalary et, balyq, sút ónimderi, sondaı-aq kókónis pen jemis-jıdektiń keń tańdaýyn usynady. Ónimderdiń fermerlerden tikeleı jetkizilýi azyq-túliktiń qoljetimdiligin arttyryp qana qoımaı, otandyq óndirýshilerdi qoldaýǵa da yqpal etedi.

Aýyl sharýashylyǵy taýar óndirýshileri Astanaǵa 350 tonnadan astam ónim ákeledi. Onyń ishinde 150 tonna kókónis pen jemis-jıdek, 80 tonna et pen et ónimderi, 50 tonna baqsha ónimderi, 30 tonna sút ónimderi, 11 tonna balyq, 6 myń dana jumyrtqa jáne 30 tonnadan astam basqa da azyq-túlik bolady.

Elorda turǵyndary men qonaqtary fermerlerden ónimdi tikeleı satyp alýmen qatar, óńirlerdiń shyǵarmashylyq ujymdary óner kórsetetin kontserttik baǵdarlamany tamashalaı alady.

Jármeńke saǵat 9:00-den 18:00-ge deıin jumys isteıdi.

Aıta keteıik, bıylǵy jármeńke «Qazanat» ıppodromy avtoturaǵynyń aýmaǵynda (Qarqaraly tas joly, 1 mekenjaıy) ótedi.

Sonymen qatar jármeńke ótip jatqan kezeńde qala turǵyndary men qonaqtarynyń yńǵaılylyǵy úshin №18, №37 jáne №303 avtobýs baǵyttary qatynaıtyn bolady.

Aıta keteıik, Astanadaǵy jármeńkege Túrkistan oblysynyń sharýalary 600 tonnadan astam ónim ákeldi.