Astanada daıyn qujattardy beretin postamaty bar jańa HQO ashyldy
HQO-nyń ashylý saltanatyna Tsıfrlyq damý, ınnovatsııalar jáne aeroǵarysh ónerkásibi Mınıstri Baǵdat Mýsın men Memlekettik korporatsııanyń Basqarma Tóraǵasy Súıenish Ábdildın qatysty.
Memlekettik korporatsııa tsıfrlyq keńselerdiń ınfraqurylymyn jyl saıyn jaqsartýda. Jańa HQO Kaizen Standart qaǵıdatyna negizdelgen. Kaizen sapany, tehnologııalardy, protsesterdi, korporatıvtik mádenıetti, eńbek ónimdiligin jáne kompanııa qyzmetiniń basqa da aspektilerin úzdiksiz jaqsartýdy qamtıdy. Jetildirý protsesine dırektorden bastap, qarapaıym qyzmetkerge deıin qatysady.
Balalarmen kelgen turǵyndardyń qolaılyǵy úshin jańa HQO ǵımaratynda, ana men balaǵa arnalǵan bólme jáne oıyn alańy bar. Jańadan ashylǵan tsıfrlyq keńse birneshe sektorǵa bólingen. Osyǵan oraı, jyldamdyq aımaǵynda memlekettik qyzmetti 10 mınýt ishinde alýǵa bolady. Ený aımaǵynda turǵyndar operatordyń kómeginsiz ózderine qajetti kez-kelgen qujatty eGov mobile qosymshasy arqyly ala alady.
Bul ortalyqta 24/7 saǵat boıy jumys isteıtin postamattar ornatylǵan. Azamattar jumystan keıin kez kelgen ýaqytta, qurylǵydan daıyn qujattardy ala alady. Bul pılottyq joba bolashaqta barlyq óńirlerde iske qosylýy josparlanýda.
Sonymen qatar, jańa ortalyqta «HQO» mobıldik qosymshasy arqyly beıne qońyraý boıynsha memlekettik qyzmetterdi alýǵa arnalǵan kabınalar ornatylǵan. Sondaı-aq, turǵyndar osy qosymsha arqyly kezekke turyp jáne óz kezegin baqylaı alady.
Budan bólek, HQO-da áleýmettik blok pen jer kadastry qyzmetterin alýǵa arnalǵan bólim, sondaı-aq, azamattar beıne qońyraý arqyly keńes ala alatyn aımaqtar bar. Múmkindigi shekteýli jandar úshin jańa ortalyqta pandýs jáne qyzmet kórsetýge arnalǵan jeke sektor qarastyrylǵan. Sonymen qatar, eger klıentterge uıaly telefondy qýattandyrý qajet bolsa, onda baılanys aımaǵynda smartfondardy qýattandyrýǵa arnalǵan birneshe qurylǵy ornatylǵan.
Aıta keteıik, jańa ǵımarattyń aýdany aldyńǵyǵa qaraǵanda 2 ese úlken. Jańa HQO-da 32 operator jumys isteıdi, bul buryńǵy Turan 37/9 kóshesinde ornalasqan HQO-dan 9 mamanǵa artyq. Qyzmetkerlerdiń sany ulǵaıǵanǵa baılanysty halyqqa jedel túrde qyzmet kórsetý júıesi odan ári jaqsarady. Jańa tsıfrlyq keńsege kúnine 1000-ǵa jýyq qyzmet alýshy keledi dep kútilýde.