Astanada daýyl: qutqarýshylar aǵashtardan aýlaq júrýge keńes beredi
ASTANA. QazAqparat - Astanalyq qutqarýshylar elorda turǵyndaryna daýyldy kúnge arnalǵan keńesterin aıtty, dep habarlaıdy QazAqparat.
«6 naýryz kúni Astanada kún qubylmaly, kúndiz jaýyn-shashyn (qar, jańbyr), kóktaıǵaq bolady. Jel aldymen ońtústik-shyǵystan, keıin ońtústik-batystan 9-14 m/s, kúndiz 15-20 m/s jyldamdyqpen soǵady, ekpini 23-28 m/s-qa deıin jetedi. Aýa temperatýrasy túnde 4-6 gradýs nólden tómen, al kúndiz 3-5 gradýsqa deıin jyly bolady. Osyǵan oraı qutqarýshylar kúsheıtilgen rejımde jumys isteıdi», - dep málimdeıdi TJD Feısbýktegi paraqshasynda.
Qutqarýshylar Astana turǵyndary men qonaqtaryna abaı bolýǵa, aýa raıynyń ózgeristeri jáne oǵan baılanysty shekteýler jaıyndaǵy habarlarǵa únemi qulaq túre júrýge, jel kúsheıgende múmkindiginshe ǵımarattan shyqpaýǵa, balalardy qaraýsyz qaldyrmaýǵa, kóshede aǵashtardan, jarnama taqtalarynan, elektr symdarynan, baǵandarynan ary júrýge keńes beredi.
Sondaı-aq tótenshe jaǵdaılar týyndaǵan kezde «112» nómirine habarlasýdy suraıdy.
