Astanada daýyl kezinde taǵy bir kran qulady
ASTANA. QazAqparat - Seısenbide Astanada nóser jańbyrmen kelgen daýyl kezinde taǵy bir kran qulady, dep habarlaıdy QazAqparat QR ІІM Tótenshe jaǵdaılar komıtetiniń baspasóz qyzmetine silteme jasap.
«Saryarqa aýdanynda Sulýkól kóshesiniń boıyndaǵy salynyp jatqan qurylys nysanynyń aýmaǵynda munaraly kran qulady. Oqys oqıǵadan eshkim zardap shekken joq», - delingen habarlamada.
Eske salaıyq, buǵan deıin Túrkistan kóshesiniń boıynda salynyp jatqan toǵyz qabatty turǵyn úı aýmaǵynda munaraly kran qulaǵany habarlaǵan bolatynbyz.
Budan bólek, TJK málimeti boıynsha, saǵat 13.15-13.20 aralyǵynda ekpindi jeldiń (21 m/s deıin) saldarynan birneshe oqıǵa tirkelgen.
Tótenshe jaǵdaılar komıteti ushý-qoný jolaǵynan shyǵyp ketken Shymkent-Astana baǵytyndaǵy A-320 ushaǵy baǵandaǵy shamdar men eki bılbordy ilip ketkenin anyqtady.
Sondaı-aq, Beıbitshilik jáne kelisim saraıynda áınekteri, qasbeti ushyp tústi, Mıchýrın kentindegi №3 mekteptiń shatyryna zaqym keldi. QR Ulttyq mýzeıi ǵımaratynan syrtqy qaptaýyshyn jel ushyryp áketti. Sondaı-aq, «Olımp Palas» turǵyn úı kesheniniń qabyrǵa bóligiopyrylyp qulady.
«112-ge» turǵyndardan ártúrli zattardyń qulaýyna baılanysty jáne zaqymdanǵan kólikter jaıynda 300-ge jýyq qońyraý túsken.
Saǵat 15:30-da medıtsınalyq kómekke 10 adam júgingen, 9-y dárigerlerge qaraldy, olardyń bireýi ǵana aýrýhanaǵa jatýdan bas tartqan.
Qazgıdromettiń málimetinshe, 22 mamyr kúni jeldiń jyldamdyǵy sekýndyna 15-20 metr shamasynda boljanǵan. Sondaı-aq, «Qazgıdrometten» Astana qalasy TJD-ge aýa-raıynyń qolaısyzdyǵyna baılanysty aldyn ala eskertý túspegen. Osyǵan baılanysty halyqqa SMS habarlama taratylǵan joq.
