Astanada dástúrli oryndaýshylardyń Á.Qashaýbaev atyndaǵy VІІІ respýblıkalyq konkýrsynyń laýreattary anyqtaldy

Uıymdastyrýshylardyń atap ótkenindeı, Á.Qashaýbaev atyndaǵy Respýblıkalyq konkýrsy elimizdegi dástúrli ánderdi nasıhattaýǵa arnalǵan jáne uıymdastyrýy, qoıylymy jaǵynan aldyńǵy qatarda júretin birden bir mádenı shara bolyp esepteledi. Sebebi onyń tarıhy keńes ýaqytynan bastalady.

Bıylǵy jyly konkýrstyń júldeli ordary úshin elimizdiń túpkir-túpkirinen kelgen 16-dan 35 jasqa deıingi 37 oryndaýshy baq talastyrdy. Qazylar alqasynyń tóraǵasy, QR Parlamenti májilisiniń depýtaty, ánshi Bekbolat Tileýhannyń aıtýynsha, munda qatysýǵa nıet bildirgenderdiń ishinde mektep jasyndaǵy jas balalardyń sany kóp bolǵan. «Bul buryn-sońdy Á.Qashaýbaev atyndaǵy konkýrstyń tarıhynda bolǵan joq»,-dep atap kórsetti bas qazy.

Degenmen baıqaýdyń bas júldesi eshkimge buıyrǵan joq. Qazylar alqasynyń sheshimi osyndaı boldy. «Kókeılerińizde kúdik bolmasyn, tap búgingi qatysqan 37 adamnyń ishinde gran-prı júldesin ala qoıatyndaı eshkimniń bolmaǵany ókinish emes, bul - qamshylaý, qaıraý dep túsinseńizder durys bolady»,-dedi B. Tileýhan júldegerlerdi marapattaý rásiminde.

Sonymen, baıqaýdyń ekinshi júldesin Erkebulan Qasymov, Gúldana Noǵaıbaeva aldy. Úshinshi júlde Allajar Qaıbar, Sáttiǵalı Nurdáýletov, Sanat Isaev syndy kúmis kómeı ánshilerge berildi. Laýreattardan bólek, QR Mádenıet mınıstrliginiń «Úkili úmit» atalymynda Orazáli Jańabaev, Ádilet Ismaıyldyń ónerleri elendi. Al taǵy bir daryndy qatysýshy Talǵat Moldaǵalıev baıqaýdyń Qalı Baıjanov atyndaǵy arnaıy júldesin qanjyǵaǵa ildi.

Qatysýshylar konkýrs talaptaryna sáıkes aldymen halyq ánshileri men kompozıtorlarynyń ánderin oryndaýy tıis boldy, sondaı-aq dombyra, qylqobyz taǵy da basqa qazaq ulttyq aspaptarynyń súıemeldeýimen Á.Qashaýbaevtyń ánderin, qazirgi kompozıtorlardyń shyǵarmalaryn oryndaýlary shart bolatyn.

Ámire Qashaýbaev elimizdiń mádenı jáne tarıhı bolmysyndaǵy iri tulǵa. Onyń oryndaýyndaǵy «Qyzyl bıdaı», «Úsh dos», «Jonyp aldy», «Ardaq», «Kelinshek», «Balqadısha», «Dýdaraı» ánderi qazaq eliniń rýhanı baılyǵy mol jáne ónerli meken ekendigin aıqyn kórsetedi. Sondaı-aq Á.Qashaýbaev Eýropaǵa qazaq ánderin alǵash pash etkender qatarynan tabylady. Máskeý, Parıj, Maındaǵy Frankfýrt qalalarynda ónersúıer qaýym Ámire arqyly qazaq halqynyń bolmysyn tanyǵan.

Mádenı is-shara Qazaqstan Respýblıkasynyń Mádenıet mınıstrligi men «Qazaq áýenderi» AQ-nyń muryndyq bolýymen ótti.