Astanada dástúrli «Mektepke jol» respýblıkalyq aktsııasy jalǵasýda
ASTANA. 25 tamyz. QazAqparat - Astanada dástúrli «Mektepke jol» respýblıkalyq aktsııasy jalǵasýda. Elorda ákimdiginiń málimetinshe, aktsııa aıasynda 3 apta ishinde elordalyq mektepterdiń 1138 oqýshysy materıaldyq kómek aldy.
23 tamyzdaǵy jaǵdaı boıynsha kómek kólemi 9,185 mln. teńgeni qurady, onyń ishinde 7,776 mln. teńgesi bıýdjettik qarjy, 1,409 mln. teńgesi bıýdjetten tys.
Aktsııa osymen besinshi jyl ótkizilip otyr. Sharanyń maqsaty oqýmen qamtylmaǵan balalardy anyqtaý, az qamtamasyz etilgen jáne kóp balaly otbasynan shyqqan oqýshylarǵa, jetim balalarǵa, sondaı-aq oqý jylynyń basyna daıyndyq ýaqyty kezinde ata-analarynyń qamqorlyǵynsyz qalǵan balalarǵa qoldaý kórsetý jáne áleýmettik sebepter boıynsha 1 qyrkúıekte mektepke balalardyń kelmeýiniń aldyn alý bolyp tabylady.
Aktsııa barysynda 1-23 tamyz aralyǵynda bilim berý uıymdary 783 oqytýshynyń qatysýymen 16 183 páterdi aralady.
Aktsııa aıasynda qalalyq ákimdik aldyndaǵy alańda 25 tamyzda Kásipkerlik jáne ónerkásip basqarmasynyń uıymdastyrýymen mektep jármeńkesi ótti.
Sonymen qosa, qaıyrymdylyq aktsııalary ótkizilip, tómendetilgen baǵada mektep formalary men oqý quraldaryn satý josparlanyp otyr.
Aktsııa 30 qyrkúıek kúni aıaqtalady.
