Astanada dástúrli «Tolaǵaı» alyptar saıysy ótedi
ASTANA. KAZINFORM — Astana kúnine oraı 6 shilde kúni dástúrli «Tolaǵaı» alyptar saıysy ótedi. Aıtýly doda qazaqtyń dańqty batyry, áıgili balýany Qajymuqan Muńaıtpasulynyń týǵanyna 155 jyl tolýyna arnalady.
Kúsh atalarynyń básekesi Astana qalasy ákimdigi ǵımaratynyń aldyndaǵy alańda ótedi. Jarystyń ashylý saltanaty saǵat 15:00-de bastalady. Qatysýshylardy tirkeý saǵat 13:00-de ótedi.
Saıys barysynda elimizdiń ár óńirinen kelgen eń myqty sportshylar alty kezeń boıynsha ózara baq synap, kúsh-qaıraty men tózimdiligin kórsetedi.
Atap aıtqanda, qatysýshylar fermer júrisi, 200 kelilik júk artylǵan arbany súıreý, salmaǵy 130 keli bolatyn bóreneni jelkege salyp otyryp-turý, 100 kelilik tasty belgilengen qashyqtyqqa deıin kóterip aparý, qylysh kóterý jáne ógiz kóterý (mýlıaj) sekildi erekshe saıys túrlerinde synǵa túsedi.
Uıymdastyrýshylardyń aıtýynsha, jarystyń basty maqsaty – ulttyq sport túrlerin nasıhattaý, jastar arasynda kúshtik sportty damytý jáne salaýatty ómir saltyn dáripteý.
Іs-sharany Astana qalasy ákimdiginiń qoldaýymen Astana qalasynyń Dene shynyqtyrý jáne sport basqarmasy uıymdastyrady.
Aıta ketelik Astana kúnine oraı halyqaralyq kóshe qoıylymdary festıvali ótedi.
