Astanada dástúrli «KitapTime — 2025» respýblıkalyq kitap festıvali ótti
ASTANA. KAZINFORM — QR Ulttyq akademııalyq kitaphanasynda dástúrli «KitapTime — 2025» IV jalpy respýblıkalyq kitap festıvali ótti. Bul týraly QR Mádenıet jáne aqparat mınıstrligi habarlady.
Shara QR Mádenıet jáne aqparat mınıstrliginiń qoldaýymen uıymdastyryldy.
Memleket basshysy Qasym-Jomart Toqaev Ulttyq quryltaı otyrystarynda eldiń bolashaǵy úshin kitap oqý men baspa isiniń mańyzdylyǵyna erekshe toqtalyp, kitap oqıtyn eldiń ǵana órkenıetti, zııaly ultqa aınalatynyn atap ótken bolatyn. Osy úndeýdi nasıhattaý maqsatynda uıymdastyrylǵan bul shara jastardyń rýhanı jáne ıntellektýaldyq damýyn qoldaýǵa, sondaı-aq ulttyq mádenı qundylyqtardy dáripteýge arnaldy.
Festıvalge ǵylym men shyǵarmashylyq zııaly qaýym ókilderi, shetel elshilikteriniń ókilderi, baspagerler, sýretshiler, qolóner sheberleri, ıllıýstratorlar, buqaralyq aqparat quraldarynyń ókilderi, kitaphanashylar men oqyrmandar, sondaı-aq Astana qalasynyń turǵyndary qatysty.
Festıval aıasynda elimizdegi jáne sheteldik baspalar men kitap dúkenderiniń qatysýymen aýqymdy kitap jármeńkesi uıymdastyryldy. Sonymen qatar qolóner jármeńkesi men arnaıy taqyryptyq kórmeler ótti.
Baǵdarlama barysynda «Abaı aýyly» etnolokatsııasy men aqyn murasyna arnalǵan kórme, «Aýylǵa kitap» syılaý aktsııasy, elshilikterdiń «Ulttyq atrıbýttar» kitap-ıllıýstratsııalyq kórmesi, «BOOKCROSSING», «BIBLIORING» ádebı oıyndary, «Velosherý», sýret kórmesi, sheberlik saǵattary, «PICNIC TIME» fotoaımaǵy jáne basqa da mádenı is-sharalar ótkizildi.
Aıta keteıik, «KitapTime — 2025» festıvali bir mezette respýblıka boıynsha barlyq óńirlik kitaphanalarda uıymdastyrylyp, túrli formatta mazmundy sharalar ótti. Bıylǵy aıtýly festıval aıasynda 1089 is-shara ótkizilip, 30 myńǵa jýyq oqyrman qamtyldy.
Eske salaıyq, «Astana Balet» teatry Koreıadaǵy dúnıejúzilik festıvalge qatysady.