Astanada daryndy jastar baq synasty
ASTANA. 31 naýryz. QazAqparat - Elordada akademııalyq sýret boıynsha І qalalyq olımpıada ótip jatyr. Sharaǵa Astana jáne Qaraǵandy mektepteri men kolledjderiniń daryndy jastary qatysty.
Barlyǵy 14 pen 20 jas aralyǵyndaǵy 43 saıysker baq synady. Olımpıada jeńimpazdaryna Eýrazııa ulttyq ýnıversıtetiniń sáýlet jáne dızaın fakýltetine túsý kezinde jeńildik berilmek. Sonymen qatar bul saıyskerler sáýlet pen dızaın boıynsha ataqty professorlardyń sheberlik saǵattaryna qatysýǵa múmkindik alady. Saıys nátıjeleri boıynsha 3 júldeli orynmen qatar «Úkili úmit» jáne «Joǵary tehnıka» arnaıy nomınatsııalary boıynsha úzdikter anyqtalmaq. Olımpıada barysynda balalarǵa antıkalyq músinderdiń gıpstik modelin akademııalyq tehnıkamen salý tapsyrmasy berildi. Bul tapsyrmany qatysýshylar 4 saǵat ishinde oryndap shyǵýǵa tıis, dep habarlaıdy 24.kz.
