Astanada dárigerlik ambýlatorııalar turǵyn úılerdiń astynda ashylýda
ASTANA. QazAqparat - Astanada jyl sońyna deıin otbasylyq dárigerlik ambýlatorııalar ashylatyn aýdandar belgili boldy, dep habarlaıdy QazAqparat Elorda Info saıtyna silteme jasap.
Elordada «Úıdegi dáriger» otbasylyq dárigerlik ambýlatorııalar jobasy iske asyrylýda. Bıyl turǵyn úı keshenderiniń birinshi qabatynda ornalasqan úsh ambýlatorııa ashyldy. Olardyń barlyǵy memlekettik-jekemenshik áriptestik aıasynda iske asyryldy. Búginde «úıdegi dárigerler» «Jaǵalaý» jańa shaǵyn aýdanynda, A.Baraev kóshesiniń halyq tyǵyz qonystanǵan aýmaǵynda, «Skazochnyı mır» turǵyn úı kesheninde ornalasqan.
«Jyl sońyna deıin «Óndiris», «Prıgorodnyı», «Ońtústik-Shyǵys», «Shubar» shaǵyn aýdandarynda dál sondaı dárigerlik ambýlatorııalardy, sondaı-aq EKSPO aýmaǵynda medıtsınalyq keshenmen qosa 350 adam qabyldaıtyn emhanany ashý josparda bar. Bul jeke ınvestıtsııalardy tartýdyń arqasynda 1,5 mlrd teńgeni únemdeýge múmkindik berdi», - delingen Astana qalasy Qoǵamdyq densaýlyqty saqtaý basqarmasynyń habarlamasynda.
Aıta keteıik, «Respýblıkalyq elektrondy densaýlyq saqtaý ortalyǵynyń» derekterine sáıkes, elorda halqynyń sany búgingi kúni 1 083 192 adamǵa jetip otyr.
Qalada 557 dárigerlik ýchaske bar. Bir dárigerge shaqqanda tıetin ortasha júkteme 2 087 adamdy quraıdy. Osyǵan oraı jyl sońyna deıin 68 jalpy tájirıbelik dárigerlik ýchaskeni ashý kózdelgen. Bul, ár ýchaskedegi adam sanyn 1700-ge jetkizýge múmkindik beredi.
