Astanada dári-dármekterdi retseptisiz satyp alý boıynsha «shuǵyl jeli» jumys isteıdi
ASTANA. QazAqparat - Astanada dári-dármekterdi retseptisiz satyp alý máseleleri boıynsha «shuǵyl jeli» jumys isteıdi, onda azamattar qajetti keńester alyp, dárilik zattardy dáriger jazyp bergen retseptisiz zańsyz satý faktileri týraly málim ete alady, dep habarlady astana.gov.kz.
Qazaqstan Respýblıkasy Densaýlyq saqtaý jáne áleýmettik damý mınıstrligi Medıtsınalyq jáne farmatsevtıkalyq qyzmetti baqylaý komıtetiniń Astana qalasy boıynsha departamenti buqaralyq aqparat quraldarynda tek dárigerdiń retseptisi boıynsha bosatýǵa ǵana arnalǵan dárilik zattardy, onyń ishinde antıbıotıkter, gormonaldyq jáne basqa da dári-dármekterdi retseptisiz alýǵa bolatyny týraly aqparatty kórsetip, jarııalaý jaǵdaılary jıilep bara jatqanyn habarlaıdy.
Ózin-ózi emdeý jáne atalǵan dári-dármekterdi asyra paıdalaný, sondaı-aq medıtsınalyq emes maqsatta paıdalanýdyń saldary aýyr bolatynyn jáne ólimge ákep soǵatynyn, al olardy retseptisiz bosatý adamdardyń daǵdylanýymen, nashaqorlyqpen jáne esirtkige táýeldilikpen aıaqtalatynyn, dáriniń tıimdiligi joqqa shyǵatynyn jáne aıtarlyqtaı janama áser etetinin eskerip, bul faktilerdi boldyrmaý úshin medıtsınalyq qaýymdastyq pen halyq birlese otyryp, bar kúshimizdi salyp jumysty belsendirý qajet.
"Osyǵan baılanysty dárihanada tek dárigerdiń retseptisi boıynsha ǵana bosatýǵa arnalǵan dárilik zattardy retseptisiz bosatý, sondaı-aq medıtsınalyq uıymdardyń dárigerleri medıtsınalyq kórsetilimder boıynsha retseptýralyq bosatýǵa jatatyn dári-dármekterge retsept jazyp bermeý bóliginde farmatsevtıkalyq qyzmet erejelerin buzý faktilerin anyqtaǵan jaǵdaıda, myna baılanys telefondaryna:
- 78-75-28,78-74-63 - senim telefonyna, www.dkkmfdastana.kz - Departament saıtyna;
- www.druginfo.kz resmı saıtyna, «Respýblıkalyq densaýlyq saqtaýdy damytý ortalyǵy» ShJQ RMK janyndaǵy Dárilik aqparattyq-analıtıkalyq ortalyqtyń 8 800 080 88 87 tegin Call-qyzmetine habarlasýyńyzdy suraımyz", - delingen habarlamada.
