Astanada danııalyq kompanııalar elektr qýatyn únemdeý jobalaryn tanystyrdy
ASTANA. QazAqparat -Astana energetıka, jylý jáne sýmen jabdyqtaý salasynda Danııanyń ozyq kompanııalarymen yntymaqtastyq ornatpaq.
Bul týraly búgin elordanyń tirshiligin qamtamasyz etýshi memlekettik organdary basshylarynyń Danııa Koroldigi delegatsııasymen kezdesýinde belgili boldy, dep habarlaıdy astana.kz.
Bıznes-mıssııany Danııa Koroldiginiń Qazaqstandaǵy Tótenshe jáne Ókiletti elshisi Tomas Vınkler bastap keldi. «Menińshe, ózara baılanystardy damytý, kelisimsharttarǵa qol qoıý - Qazaqstan men Danııa arasyndaǵy qarym-qatynastardy damytýdyń mańyzdy bóligi. Meniń elim, meniń úkimetim, biz osy sektorda eki el arasynda baılanystardy damytýdyń áleýeti zor dep esepteımiz», - dedi óz sózinde Tomas Vınkler myrza.
Qazaqstan tarabymen kezdesýge basqa memleketterde jumys isteý tájirıbesi baı jeti iri sheteldik kompanııanyń ókilderi keldi.
«Energııa únemdeý jáne qala nysandaryn, sonyń ishinde ónerkásip jáne turǵyn úı sektorynyń nysandaryn jylýmen jabdyqtaý boıynsha zamanaýı ınnovatsııalyq tehnologııalar tanystyryldy. Bul- bizdiń qalamyz úshin óte mańyzdy másele, óıtkeni qazir qala basshylyǵy ázirlep jatqan baǵdarlama turǵyndar úshin ómir sapasyn laıyqty deńgeıde qamtamasyz etý úshin jaqyn ýaqytta, EKSPO ótetin kezeńde jáne odan keıingi jyldary qalany jylýmen, sýmen jáne elektr qýatymen jabdyqtaý júıesin jańǵyrtýdy qarastyrady», - dep atap kórsetti elordanyń Kommýnaldyq sharýashylyq basqarmasynyń basshysy Tólegen Zakarıanov.
