Astanada «Damý» baǵdarlamasyn paıdalanyp nesıe rásimdegender sottaldy
ASTANA. KAZINFORM — Astanada bir top adam jasaǵan alaıaqtyq jáne qylmystyq jolmen alynǵan kiristerdi zańdastyrý faktisi boıynsha úkim shyǵaryldy. Bul týraly Qarjylyq monıtorıng agenttigi baspasóz qyzmeti habarlady.
Tergeýdi QMA Astana qalasy boıynsha departamenti júrgizdi.
Tergeý barysynda anyqtalǵandaı, 2023 jyly kúdikti áıel, ulynyń atynan berilgen senimhat negizinde áreket etip, «Bank TsentrKredıtten» jalpy somasy 115 mln teńge bolatyn eki nesıe rásimdegen. Nesıe «DAMÝ» kásipkerlikti damytý qory sýbsıdııalaıtyn memlekettik jeńildetilgen nesıeleý baǵdarlamasy aıasynda alynǵan.
Nesıe alý maqsatynda bankke jalǵan qujattar, onyń ishinde múlikti kepilge qoıý boıynsha jalǵan baǵalaý aktileri usynylǵan. Oń qorytyndy alý úshin kúdiktiler naryqtyq qunyna sáıkes kelmeıtin jyljymaıtyn múlikti atyna rásimdegen tulǵalardy tartqan.
Sondaı-aq, 2023 jyldyń jeltoqsanynda kúdiktiler qaterli isikpen aýyrǵan áıeldiń atyna 155 mln teńge kóleminde taǵy bir nesıe rásimdegen.
Nan pisirý jabdyqtaryn satyp alý jeleýimen olar áıeldiń elektrondyq tsıfrlyq qoltańbasyn (ETsQ) paıdalanyp, jalǵan kelisimsharttar, shot-faktýralar, oryndalǵan jumystar týraly aktiler ázirlegen. Bul qujattar jabdyqty jeke kásipkerler jetkizgenin rastaǵandaı bolǵanymen, is júzinde eshqandaı jetkizý bolmaǵan.
Qarajat jeke kásipkerlerdiń shottaryna aýdarylyp, qolma-qol aqshaǵa aınaldyrylǵan. Áıel qaıtys bolǵannan keıin de uıymdastyrýshylar jalǵan qujattardy keıingi kúnmen rásimdeýdi jalǵastyrǵan.
Tergeý barysynda bank qyzmetkeriniń nesıe ótinimderin rásimdeýge kómekteskeni úshin 500 myń teńge kóleminde syıaqy alǵany anyqtaldy.
Bankke keltirilgen jalpy shyǵyn - 155 mln teńge.
Sot úkimimen kúdiktiler kináli dep tanylyp, árqaısysyna 5 jyl merzimge bas bostandyǵynan aıyrý jazasy taǵaıyndaldy. Sondaı-aq, qylmystyq jolmen alynǵan kiristerge satyp alynǵan demalys bazasy, 2000 sharshy metr jer telimi, elordadaǵy kommertsııalyq jyljymaıtyn múlik memleket kirisine tárkilendi.
Úkim zańdy kúshine engen joq.
Aıta ketelik Batys Qazaqstan oblysynda iri ınternet-alaıaqtyq áshkerelengen edi.