Astanada dámhananyń jazǵy alańynan órt shyqty

ASTANA. QazAqparat – Tótenshe jaǵdaılar mınıstrliginiń baspasóz qyzmeti Astanadaǵy dámhanada bolǵan oqys oqıǵa týraly málimet berdi, dep habarlaıdy QazAqparat tilshisi.

«7 maýsym kúni saǵat 12:57-de Almaty aýdanynyń Qajymuqan kóshesi, 1 mekenjaıynda, «Renessans» dámhanasynda eki jazǵy samaljaı órtendi. Tótenshe jaǵdaılar departamentiniń bólimsheleri oqıǵa ornyna dereý jetti. Saǵat 13:13-te 60 sharshy metr aýmaqty sharpyǵan órt sóndirildi. Qurban bolǵandar men zardap shekkender joq», - delingen resmı aqparatta.

Vedomstvo mamandary dámhanadaǵy dúmpýdiń neden bolǵanyn túsindirdi.

Nysanda gaz ballonynyń jarylǵany týraly málimet rastalǵan joq.

«Aýa men gaz qosyndysynan tarsyl shyqqan. Eshkim zardap shekpedi», - dep jazylǵan mınıstrliktiń baspasóz qyzmeti usynǵan málimette.