Astanada dámhanada tamaqtanǵan eki bala aýrýhanaǵa tústi
ASTANA. KAZINFORM – Astanada jyldam tamaqtaný ornynda as ishken eki bala qatty allergııalyq reaktsııa saldarynan aýrýhanaǵa tústi. Bul týraly balalardyń biriniń anasy Threads áleýmettik jelisinde jazdy.
Áıeldiń aıtýynsha, tamaqtanǵannan birneshe saǵat ótken soń balasynyń búkil denesine qyshıtyn bórtpe shyǵyp, terisi qyzara bastaǵan. Bórtpe tez taralǵan.
Jazba avtorynyń sózinshe, allergııaǵa qarsy dári kómektespegen soń, jedel járdem shaqyrýǵa týra kelgen. Medıtsına qyzmetkerleri balaǵa prednızolon ekken. Sondaı-aq Kvınke isinýi paıda bolýy múmkin ekenin eskertken.
Kelesi kúni allergııalyq reaktsııa qaıtalanyp, bala aýrýhanaǵa jatqyzylǵan. Anasynyń aıtýynsha, keıingi kúnderi de denesindegi bórtpe men qyzarý basylmaǵan.
Áıeldiń aıtýynsha, aýrýhanaǵa dál osyndaı belgilermen taǵy bir bala túsken. Ol da Astanadaǵy saýda ortalyqtarynyń birinde ornalasqan jyldam tamaqtaný ornynda as ishken.
Osy jaǵdaıǵa baılanysty Kazinform tilshisi Astana qalasynyń Densaýlyq saqtaý basqarmasyna habarlasty. Basqarma eki balaǵa da medıtsınalyq kómek kórsetilip jatqanyn rastady.
– Naýqastarǵa barlyq qajetti medıtsınalyq kómek kórsetilip jatyr. Jaǵdaılary turaqty, oń ózgerister baıqalady, – dep habarlady basqarma.
Eske salaıyq, 14 qazanda Almatydaǵy Respýblıkalyq fızıka-matematıka mektebiniń 47 oqýshysy jedel ishek ınfektsııasynyń belgilerimen aýrýhanaǵa jatqyzylǵany habarlanǵan edi.
Keıin oqýshylardyń barlyǵy aýrýhanadan shyǵaryldy.
