Astanada dámhana men meıramhanalardan 1 myńnan astam zańbuzýshylyq anyqtaldy
ASTANA. KAZINFORM — Astanada qoǵamdyq tamaqtaný oryndaryndaǵy órt qaýipsizdigi talaptarynyń saqtalýy tekserildi. Nátıjesinde 1 myńnan astam zańbuzýshylyq anyqtalyp, kásipkerlerge ákimshilik aıyppul salyndy. Jyl basynan beri qaladaǵy osyndaı nysandarda 33-ke jýyq órt oqıǵasy tirkelgen. Bul týraly elorda ákimdigi habarlady.
Mamandar qaladaǵy birqatar qoǵamdyq tamaqtaný nysandaryn aralap, kásipkerlermen jáne qyzmetkerlermen kezdesýler uıymdastyrdy. Kezdesý barysynda órttiń aldyn alý, qaýipsizdik talaptaryn saqtaý jáne tótenshe jaǵdaı kezinde durys áreket etý máselelerine toqtaldy. Sonymen qatar, kásip ıelerine as úı jabdyqtaryn, gaz qurylǵylary men elektr quraldaryn qaýipsiz paıdalaný jóninde túsindirý jumystaryn júrgizdi. Sondaı-aq elektr jelilerine shamadan tys júkteme túsirmeý, elektr jabdyqtarynyń jaramdylyǵyn únemi tekserý, gaz qurylǵylaryn paıdalaný kezinde qaýipsizdik erejelerin saqtaý qajettigi eskertildi.
— Qoǵamdyq tamaqtaný oryndarynda arnaıy is-shara ótip jatyr. Tekserý barysynda myńnan astam órt qaýipsizdik talaptarynyń buzylǵany anyqtaldy. Anyqtalǵan buzýshylyqtarǵa sáıkes ákimshilik aıyppul salyndy. Aıta keter bolsaq, jyl basynan beri qoǵamdyq tamaqtaný oryndarynda otyz úshke jýyq órt oqıǵasy oryn aldy, -dedi Astana qalasy Tótenshe jaǵdaılar departamentiniń Memlekettik órt baqylaý basqarmasy bastyǵynyń orynbasary Ǵabıt Babaev.
Mamandardyń aıtýynsha, qoǵamdyq tamaqtaný oryndarynda órt shyǵý qaýpin arttyratyn negizgi faktorlardyń biri — as úı jabdyqtaryn durys paıdalanbaý, elektr jáne gaz qurylǵylarynyń aqaýy, sondaı-aq qaýipsizdik talaptaryna nemquraıly qaraý. Sondyqtan mundaı nysandarda órttiń aldyn alý sharalary turaqty túrde júrgizilip turady.
Aıta ketý kerek, Astana qalasynyń Tótenshe jaǵdaılar departamenti kásipkerler men nysan qyzmetkerlerin órt qaýipsizdigi talaptaryn qatań saqtaýǵa, qaýipsizdik sharalaryna jaýapkershilikpen qaraýǵa shaqyrady. Sebebi tótenshe jaǵdaıdyń aldyn alý — ortaq mindet ekenin qaperge berdi.
Eske sala keteıik, jaqynda Aqtóbedegi kafede gaz-aýa qospasy jarylyp, eki adam zardap shekken bolatyn.