Astanada Coupe Mondiale 79 halyqaralyq baıanıster men akkordeonshylar baıqaýy bastaldy
ASTANA. KAZINFORM – Astanada Roza Baǵlanova atyndaǵy «Qazaqkontsert» memlekettik akademııalyq kontserttik uıymynda QR Mádenıet jáne aqparat mınıstrliginiń qoldaýymen «Coupe Mondiale 79» halyqaralyq baıanıster men akkordeonshylar baıqaýynyń saltanatty ashylý rásimi ótti, dep habarlaıdy Mádenıet jáne aqparat mınıstrligi.
Saltanatty sharaǵa QR Mádenıet jáne aqparat vıtse-mınıstri, Halyqaralyq akkordeonshylar konfederatsııasynyń (CIA) basshylyǵy men delegattary, halyqaralyq qazylar alqasynyń músheleri, baıqaýǵa qatysýshylar, otandyq jáne sheteldik mýzyka mamandary men ónersúıer qaýym qatysty.
Ashylý rásiminde Mádenıet jáne aqparat vıtse-mınıstri Aıbek Sydyqov Qazaqstan Respýblıkasy Premer-mınıstriniń orynbasary – Mádenıet jáne aqparat mınıstri Aıda Balaevanyń quttyqtaý hatyn jetkizdi.
Aıda Balaeva mýzyka álemindegi eń bedeldi óner dodalarynyń biri – «Coupe Mondiale» baıqaýynyń Qazaqstanda ótýi elimizdiń mádenıet salasyn damytý jáne halyqaralyq shyǵarmashylyq baılanystardy nyǵaıtý baǵytynda atqarylyp jatqan júıeli jumystyń jarqyn kórinisi ekenin atap ótti.
– Bul Qazaqstan úshin ǵana emes, tutas Ortalyq Azııanyń mádenı ómirindegi aıtýly oqıǵa. Uzaq jyldar boıy dúnıejúziniń tańdaýly oryndaýshylaryn bir arnaǵa toǵystyryp kele jatqan baıqaý kásibı sheberlik pen shyǵarmashylyq izdenistiń bedeldi alańyna aınaldy. Bıyl álemniń qyryqqa jýyq elinen óner maıtalmandary men daryndy jastardyń, sarapshylar men resmı delegatsııalar ókilderiniń qatysýy onyń halyqaralyq mártebesin aıǵaqtaıdy. Halyqaralyq akkordeonıster konfederatsııasy basshylyǵy men bedeldi ókilderiniń elimizge kelýi de Qazaqstannyń mádenı áleýetine kórsetilgen zor senimniń belgisi dep bilemin. Bul qazaqstandyq jas mýzykanttardyń kásibı sheberligin shyńdap, halyqaralyq tájirıbe jınaqtaýyna jáne álemdik sahnaǵa shyǵýyna jańa múmkindikter ashady, – delingen quttyqtaý hatynda.
Álemdik baıan jáne akkordeon ónerindegi eń bedeldi dodalardyń biri sanalatyn «Coupe Mondiale» bıyl alǵash ret Qazaqstanda jáne Ortalyq Azııada ótip otyr. Halyqaralyq baıqaý kásibı oryndaýshylardy, mýzyka mamandaryn, halyqaralyq sarapshylardy jáne baıan men akkordeon óneriniń tanymal ókilderin elorda tórinde toǵystyrdy.
Aýqymdy mádenı sharaǵa Halyqaralyq akkordeonshylar konfederatsııasynyń 48 delegaty qatysýǵa keldi. Olardyń qatarynda uıym basshylyǵy, mýzykalyq komıtet músheleri, halyqaralyq qazylar men álemdik baıan jáne akkordeon óneriniń belgili ókilderi bar.
Delegatsııa quramyna Italııa, Fınlıandııa, Frantsııa, Qytaı, Avstralııa, Jańa Zelandııa, Germanııa, Avstrııa, Serbııa, Shveıtsarııa, Qazaqstan jáne basqa da memleketterdiń ókilderi engen.
Qurmetti meımandar qatarynda Halyqaralyq akkordeonshylar konfederatsııasynyń prezıdenti Mırko Patarını bar. Italııalyq mýzykant ári halyqaralyq mýzyka qaýymdastyǵynyń bedeldi ókili Mırko Patarını kóptegen jyl boıy álemdegi baıan jáne akkordeon óneriniń damýyna, oryndaýshylar arasyndaǵy halyqaralyq shyǵarmashylyq baılanysty nyǵaıtýǵa úles qosyp keledi.
Sondaı-aq elordaǵa CIA Bas hatshysy Kımmo Mattıla, uıymnyń qoǵammen baılanys jónindegi menedjeri Harlı Djons, Mýzykalyq komıtet tóraǵasy Aleksandr Selıvanov, Mýzykalyq komıtet tóraǵasynyń orynbasary Greıson Meısfıld, Kongıý (Krıstal) Vang jáne Halyqaralyq konfederatsııanyń ózge de ókilderi keldi.
«Coupe Mondiale 79» aıasynda halyqaralyq baıqaýmen qatar Halyqaralyq akkordeonshylar konfederatsııasy delegattarynyń 156-shy kongresi ótip jatyr.
Kongress barysynda uıymnyń halyqaralyq qyzmeti, baıan jáne akkordeon ónerin odan ári damytý, kásibı mýzykalyq bilim men ulttyq oryndaýshylyq mektepter arasyndaǵy baılanysty nyǵaıtý máseleleri talqylanady.
Bıylǵy dodaǵa barlyǵy 147 ótinim qabyldandy. Onyń 126-sy jeke oryndaýshylardan, 21-i ansamblderden túsken. Konkýrsqa qatysýshylardyń jalpy sany – 153 adam.
Olar Qazaqstan, Reseı, Qytaı, Italııa, Portýgalııa, Chernogorııa, Serbııa, Horvatııa, Shveıtsarııa, Japonııa, Ózbekstan, Brazılııa, Bosnııa jáne Gertsegovına, Qyrǵyzstan, Soltústik Makedonııa jáne Belarýs elderinen kelgen ónerpazdar.
Saltanatty ashylý rásimi birneshe kúnge jalǵasatyn halyqaralyq mýzykalyq dodanyń resmı bastalýyn aıshyqtady. Aldaǵy kúnderi qatysýshylar jeti atalym boıynsha ózara synǵa túsip, álemniń jetekshi mýzyka mamandary men halyqaralyq qazylar alqasynyń aldynda óner kórsetedi.
Aıta keteıik, Smıtson ınstıtýty Qazaqstan mádenıetin AQSh-ta nasıhattaýǵa qoldaý kórsetedi.
