Astanada Comtrux Astana 2026 jáne Eurasian Construction Technology Astana 2026 kórmeleri ashyldy
ASTANA. KAZINFORM - 2026 jylǵy 5 mamyrda Astana qalasyndaǵy EXPO halyqaralyq kórme ortalyǵynda Comtrux Astana 2026jáneEurasian Construction Technology Astana 2026 halyqaralyq salalyq kórmeleriniń saltanatty ashylý rásimi ótti.
QR Ónerkásip jáne qurylys mınıstrligi baspasóz qyzmetiniń habarlaýynsha, 5-7 mamyr aralyǵynda elimizdiń bas qalasy kólik, logıstıka jáne qurylys salalary ókilderi bas qosatyn mańyzdy iskerlik alańǵa aınaldy.
Kórmede kommertsııalyq kólik, arnaıy tehnıka, qurylys jáne jol jabdyqtary, avtokomponentter, servıstik sheshimder, lızıng quraldary men bızneske arnalǵan zamanaýı tehnologııalar tanystyryldy.
Atalǵan kórmelerge 147-den astam kompanııa qatysyp, 50-den astam tehnıka úlgisi kópshilik nazaryna usynyldy. Sondaı-aq Ózbekstan Respýblıkasy men Qytaı Halyq Respýblıkasynyń ulttyq pavılondary tanystyrylyp, sharanyń halyqaralyq deńgeıin aıqyndaı tústi.
Ashylý rásimine memlekettik organdar men bıznes qaýymdastyq ókilderi qatysty. Olardyń qatarynda Qazaqstan Respýblıkasy Ónerkásip jáne qurylys mınıstrligi, Kólik mınıstrligi, Saýda jáne ıntegratsııa mınıstrligi, Týrızm jáne sport mınıstrligi, Energetıka mınıstrliginiń vıtse-mınıstrleri de boldy.
Qazaqstan Respýblıkasy Ónerkásip jáne qurylys vıtse-mınıstri Oljas Saparbekov kórmelerdiń sala damýy úshin strategııalyq mańyzyna toqtaldy.
-Infraqurylymdy damytý, jańa óndiristerdi iske qosý jáne iri jobalardy júzege asyrý zamanaýı tehnıkaǵa, tıimdi logıstıkaǵa jáne ornyqty jetkizý qyzmetterine tikeleı baılanysty. Comtrux Astana men Eurasian Construction Technology Astana alańdarynda atalǵan salalardyń ókilderi bas qoıyp, ózara pikir almasyp, ortaq máselelerdi talqylaıdy. Bul óz kezeginde yntymaqtastyqty keńeıtýge, kelisimsharttar jasaýǵa jáne jańa naryqtarǵa jol ashýǵa múmkindik beredi, – dedi Oljas Saparbekov.
Sondaı-aq sharaǵa Germanııa, Portýgalııa, Kanada, Belarýs, Ózbekstan, Qyrǵyzstan, Ýkraına, Úndistan, Estonııa, Túrkııa jáne Slovakııa elderiniń dıplomatııalyq mıssııalary men ekonomıkalyq ókildikteriniń ókilderi, «Atameken» ulttyq kásipkerler palatasynyń basshylyǵy jáne salalyq qaýymdastyq jetekshileri qatysty.
Sóz etilgen kórmelerdiń ashylýy iskerlik yntymaqtastyqty damytýǵa jáne halyqaralyq baılanystardy nyǵaıtýǵa serpin berip, Qazaqstannyń Ortalyq Azııadaǵy jetekshi logıstıkalyq jáne ındýstrııalyq hab retindegi bedelin nyǵaıtty.
Osyǵan deıin elordada ótken RES 2026 EXPO kórmesi týraly jazdyq.
