Astanada COBIS halyqaralyq oıyndary ótti
ASTANA. QazAqparat - Elordada COBIS (Council of British International Schools) Brıtan Halyqaralyq mektebiniń tómengi synyp oqýshylarynyń arasyndaǵy halyqaralyq oıyndary ótti, dep habarlaıdy qalanyń resmı saıty.
Eki kúnge sozylǵan sharaǵa álemniń túkpir-túkpirinen kelgen 336 oqýshy júzý, jeńil atletıka jáne fýtboldan jarysty.
Oıyndardyń ashylýynda qonaqtar qazaqtyń ulttyq salt-dástúrlerimen tanysty. Kelesi kúni qatysýshylar «Qazaqstan» sport saraıynda júzýden saıysty. Sodan keıin QSI halyqaralyq mektebinde jeńil atletıkadan jarystar uıymdastyryldy. Oıyndar «Astana Arena» stadıonynda fýtbol matchtarymen aıaqtaldy. Bul týrnırde nıgerııalyq St. Saviour's mektebi jeńiske jetti.
Aıta keteıik, COBIS oıyndary oqýshylar úshin eń iri halyqaralyq sharalardyń biri bolyp tabylady. Atalǵan oıyndardyń eki sanaty bolady: joǵary synyptarǵa (7-8 synyptar) jáne tómengi synyptarǵa (5-6 synyptarǵa) arnalǵan. Oıyndar jyl saıyn túrli memleketterde ótkiziledi.
