Astanada tsırk óneri festıvali ótip jatyr (FOTO)
ASTANA. QazAqparat - 2-7 shilde aralyǵynda Astanalyq tsırkte «Azııa jańǵyryǵy» ІH halyqaralyq tsırk óneri festıvali ótedi. Elorda turǵyndary men qonaqtary segiz memlekettiń ártisteriniń ónerin tamashalaıdy, dep habarlaıdy qala ákimdiginiń baspasóz qyzmeti.
Uıymdastyrýshylar kórermender nazaryna kóptegen biregeı nomerler usynbaq. Merekelik shara qarsańynda ótken baspasóz máslıhaty barysynda festıvaldi uıymdastyrýshylar qazaqstandyq jáne sheteldik tsırk ártisteriniń ázirlegen tosyn syılary týraly aıtyp berdi.
QR eńbek sińirgen ártisi, «Astanalyq tsırk» MQKK bas dırektory Erik Joljaqsynovtyń aıtýynsha, qonaqtar este qalarlyq jarqyn qoıylymdar usynbaq. Belarýs, Gollandııa, Qyrǵyzstan, Mońǵolııa, Reseı, Túrkimenstan jáne Efıopııa, sonymen qatar qazaqstandyq tsırk óneriniń maıtalmandary óz ónerlerin ortaǵa salady. Tsırk dýmanynyń ereksheligi - Afrıkanyń ekzotıkalyq janýarlary - kerik Bagıra men múıiztumsyq Bonı, sondaı-aq, úıretilgen janýarlar men maımyldar bolmaq. Reseılik tsırktiń bas ań úıretýshisi Roman Gormashtyń aıtýynsha, tórt aıaqty ártister arenada vals bılep, zaldaǵy kórermenderge «qylmyńdaıdy». Tsırk tamashalaýǵa kelgen názik jandylardyń birin kerik súıip alady. Reseılik ártistiń aıtýynsha, bul kúlkili kóringenmen, umytylmas áser qaldyrmaq. Aıta keteıik, keriktiń júrip-turýy úshin astanalyq tsırk qyzmetkerleri keıbir konstrýktsııalardy alyp tastady, esikti úlkeıtti.
Munymen qosa, tsırk kúmbeziniń astynda akrobattar, mototsıkl mingen ekvılıbrıstter, arqanmen júretin ártister óner kórsetpek. Kórermender efıopııalyq ártisterdiń oryndaýyndaǵy tań qaldyrarlyq jáne asa kúrdeli ıkarıılik oıyndardy tamashalaıdy. 
