Astanada «Chevrolet» tizgindegen mas júrgizýshi 6 kólikti soqty
NUR-SULTAN. QazAqparat – Nur-Sultan qalasynda mas júrgizýshi 6 kólikti soqty, dep habarlaıdy QazAqparat.
«19 tamyz kúni túngi saǵat 02.30-da «Chevrolet Cobalt» markaly kólikti mas kúıinde tizgindegen 41 jastaǵy júrgizýshi Kenesary kóshesimen kele jatyp, kóligine ıe bola almaı, túrli markaly 6 kólikti qaqty. Atalǵan fakti boıynsha tergeý júrip jatyr. Quqyq buzýshynyń kóligi kommýnaldyq turaqqa qoıyldy», - dedi qalalyq Polıtsııa departamentinen.
Vedomstvodan málim etkendeı, jyl basynan beri elordada alkogolge elitken júrgizýshiler 86 jol-kólik apatyn jasaǵan.
Sonymen qatar polıtsııa qyzmetkerleri kólik quralyn mas kúıde basqarǵan 356 júrgizýshini ustap, olardy ákimshilik tutqynǵa aldy jáne 7 jylǵa kólik basqarý quqyqtarynan aıyrdy.
«Elordalyq polıtsııa jol-kólik oqıǵalaryn tómendetý jáne aldyn alý maqsatynda apatqa alyp keletin ári saldary aýyr bolatyn jol júrisi erejesin buzýshylardy, onyń ishinde kólikti mas kúıde basqaratyndardy anyqtaý jumystaryn jandandyrdy. Osyǵan oraı departament tarapynan «Mas júrgizýshi – qylmysker!« jedel aldyn alý sharasy aıasynda reıdtik sharalar turaqty júrgiziletin bolady. Nur-Sultan qalalyq Polıtsııa departamenti elorda turǵydarynan júrgiziletin sharaǵa túsinistikpen qaraýǵa shaqyrady. Eger siz avtokólikti mas kúıde basqarý faktisine kýá bolsańyz, onda 102, 71-65-12 telefon nómirlerine habarlasýdy ótinemiz», - dedi departamentten.
