Astanada cherlıdıngten I ulttyq chempıonattyń jeńimpazdary anyqtaldy

Onyń jeńimpazdaryna kýboktar men dıplomdar tapsyryldy. Jarys 1-4 synyp, 5-8 synyp oqýshylary jáne 16 jastan joǵary jas kategorııalary boıynsha cherlıdıngtiń «Cheer Mixed», «Cheer All Female Mixed», «Group Stunt Mixed», «Group Stunt All Female», «Chır Dans» túrleri boıynsha ótkizilgen bolatyn. Ár túrli atalymdar boıynsha 1-4 synyptar arasynda Parı (Qaraǵandy), Kardınal (Almaty) toptary, 5-8 synyp oqýshylary arasynda Kardınal (Almaty), Tetcheer (Almaty), Ekstrım (Almaty) jáne elordalyq Astana toby, 16 jas jáne odan joǵary jas aralyǵyndaǵy toptar arasynda Kardınal (Almaty), Ekstrım (Almaty) komandalary úzdik atandy. Endi olar Azııa birinshiliginde, taǵy da basqa halyqaralyq cherlıdıng jarystarynda el namysyn qorǵaıtyn bolady.

Saltanatty sharaǵa Cherlıdıng Halyqaralyq  Federatsııasynyń prezıdenti Setsýo Nakamýra myrza (Japonııa), Eýropalyq Cherlıdıng Federatsııasynyń prezıdenti  Koroses Voıko myrza (Slovenııa), Azııa  Cherlıdıng Federatsııasynyń Bas hatshysy Leblond myrza qatysty.

Cherlıdıng chempıonatynyń resmı jabylý rásiminde tanymal Qazaqstan estrada juldyzdarynyń qatysýymen kontsert jáne lazerlik shoý ótti. Sonymen qatar chempıonattyń qonaǵy retinde álemniń úsh dúrkin chempıondary Japon eliniń «DRIPPERS» komandasy qatysýshylar jáne elorda turǵyndary aldynda ózderiniń ónerlerin pash etti.

Aıta keteıik, Astanadaǵy «Dáýlet» sport kesheninde cherlıdıngten I ulttyq chempıonat qazannyń 3-4-i aralyǵynda ótti. Bul jarysqa jalpy 50-den astam komanda qatysty. Olardyń ishinde bı toptary,   cherlıdıng   klýbtary jáne Qyrǵyz Respýblıkasynan Bishkek cherlıdıng ujymy bar. Qatysýshylardyń jalpy sany - 500 adam.   Cherlıdıng - bı, gımnastıka men akrobatıkany úılestirgen sporttyń bir túri. Onda shoýdyń elementteri basym bolady.   Cherlıdıng   1870 jyldary AQSh-ta paıda bolyp, sport komandalaryn demeýshi bı toptary arqyly tanymal bola bastady.