Astanada cherlıdıngten I ulttyq chempıonat ótedi
ASTANA. 29 qazan. QazAqparat - Qazannyń 3-4-i aralyǵynda Astana qalasynda cherlıdıngten I ulttyq chempıonat ótedi. Bul týraly búgin elordada ótken baspasóz máslıhatynda QR Ulttyq cherlıdıng federatsııasynyń prezıdenti Alfııa Qalmaǵanbetova málim etti.
Onyń habarlaýynsha, elimizde alǵash ret uıymdastyrylatyn jarysqa 50-den astam komanda qatysady. Olardyń ishinde bı toptary, cherlıdıng klýbtary jáne taǵy basqa ujymdar bar. Qatysýshylardyń jalpy sany - 500 adam. «Negizi, Almatyda cherlıdıng buqaralyq sport túri retinde jaqsy damyǵan. 2007 jyldan bastap qalanyń kóptegen mektepterinde cherlıdıng dene shynyqtyrý pániniń qosymsha sabaǵy retinde engizildi. Osynyń arqasynda Almatyda 72 komanda quryldy. Olardyń qatarynda 1,5 myń bala óner kórsetip júr. Astanada bolsa, sporttyń bul túri tıisti deńgeıde damymaı otyr. Sol sebepti biz cherlıdıngten alǵashqy ulttyq chempıonatty elordada ótkizýdi uıǵardyq», - deıdi A. Qalmaǵanbetova.
Aıta keteıik, chempıonat qazannyń 3-4-i kúnderi «Dáýlet» sport kesheninde ótedi. Chempıonat jeńimpazdaryn marapattý rásiminde álem chempıony - Japonııanyń «Drippers» komandasy óner kórsetpek.
Cherlıdıng (aǵyl. «cheerleading» degen sózinen shyqqan) - bı, gımnastıka men akrobatıkany úılestirgen sporttyń bir túri. Onda shoýdyń elementteri basym bolady. Cherlıdıng 1870-jyldary AQSh-ta paıda bolyp, sport komandalaryn demeýshi bı toptary arqyly tanymal bola bastady.
