Astanada bıýdjet qarjysynyń qaıda jumsalǵanyn kórsetetin karta ornatylady

ASTANA. QazAqparat - Elordada bıýdjet qarajatynyń qaıda jumsalǵanyn egjeı-tegjeıli kórsetetin ınteraktıvti karta ornatylady, dep habarlaıdy QazAqparat tilshisi.

Bul týraly Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev málimdedi.

«Jaqyn arada Agenttik «Tsıfrlyq agent» mobıldi qosymshasyn tanystyrady. Bul qosymsha arqyly qazaqstandyqtar HQKO, emhanalar men ózge de memlekettik mekemelerdiń qyzmet kórsetý sapasy týraly Agenttikke usynys-shaǵymdar jibere alady. Sonymen birge, Astanada qoǵamdyq baqylaýdyń ınteraktıvti kartasy tanystyrylady. Bul arqyly elorda turǵyndary bıýdjet qarajatynyń qaıda jumsalyp jatqanyn egjeı-tegjeıli kóre alady. Qandaı da bir aýytqýlar bolsa, bizdiń agenttikke habarlasý kerek», - dedi Shpekbaev 2018 jyldyń ekinshi jartysyndaǵy jumys qorytyndysyna arnalǵan keńeıtilgen alqa otyrysynda.

Agenttik tóraǵasy Qazaqstannyń elektrondy úkimetti damytý salasyndaǵy tabysynyń álemde moıyndalǵanyn atap ótti.

«2018 jyly elektrondy qyzmetter boıynsha Qazaqstan 25-orynǵa turaqtady. Endi 2020 jylǵa deıin memlekettik qyzmetterdiń 90 paıyzyn avtomattandyrý kerek», - dedi Alık Shpekbaev.