Astanada buzylǵan eski úılerdiń aýmaǵyna saıabaqtar men sport alańdary salynady
ASTANA. QazAqparat - Búgin elorda ákimi Áset Isekeshev eski jáne apatty jaǵdaıdaǵy turǵyn úılerdi buzý boıynsha pılottyq jobanyń oryndalý barysymen tanysty. Shara barysynda qala basshysy buzylatyn eski úılerdiń aýmaǵyn abattandyryp, qala turǵyndary demalatyn oryndar jasaýdy tapsyrdy. Memleket basshysynyń qalany kógaldandyrý boıynsha tapsyrmasyn oryndaý aıasynda elorda ákimdigi aýla aýmaqtaryn abattandyrý jónindegi jańa baǵdarlamany qolǵa almaq, dep habarlaıdy qalalyq ákimdiktiń baspasóz qyzmeti.
«Jaıly qala aýladan, úıdiń janyndaǵy saıabaqtan, otbasymen demalýǵa bolatyn gúlbaqtan bastalady. Elordany abattandyrý men kógaldandyrý qalanyń jańa bóliginde ǵana emes, qala boıynsha júrgizilýi kerek. Eski úılerdiń ornyna jańalary turǵyzylsyn nemese aǵashtar otyrǵyzyp, gúlbaqtar men sport alańdaryn jasaý qajet», - dedi Astana ákimi.
Qazirgi kezde qala boıynsha osyndaı 17 aýmaq anyqtaldy. Qala basshysy keler jyly jańa alańdardy paıdalanýǵa berý úshin jaqyn arada aýla aýmaqtaryn abattandyrýdyń tıptik jobalaryn ázirleýdi tapsyrdy. Bul rette eń aldymen demalatyn orny joq aýlalar abattandyrylmaq.
Qala basshysy óziniń birinshi orynbasary Sergeı Horoshýnǵa ıgerilmegen jer ýchaskelerine, josyqsyz salýshylardyń aýmaqtaryna jáne jer ýchaskelerin óz betinshe basyp alǵandarǵa taldaý júrgizip, usynys ázirleýdi tapsyrdy. Bolashaqta bul aýmaqtar da qala turǵyndarynyń súıikti demalys ornyna aınalmaq.
Elorda ákimi jobalardy ázirleý barysynda qala turǵyndarynyń da pikirin eskerý qajet ekendigin atap ótti.
