Astanada BUU Damý Baǵdarlamasymen birlese ázirlengen Sý seriktestigi bastamasy tanystyryldy
ASTANA. KAZINFORM – Sý resýrstary jáne ırrıgatsııa mınıstrligi men BUU Damý Baǵdarlamasy 2024-2030 jyldarǵa arnalǵan Sý seriktestigi bastamasyn tanystyrdy. Bul týraly vedomstvonyń baspasóz qyzmeti málim etti.
Astanada Qazaqstandaǵy BUU Damý Baǵdarlamasynyń (BUUDB) qoldaýymen Sý resýrstary jáne ırrıgatsııa mınıstrligi uıymdastyrǵan sý sektoryn damytý jónindegi áriptesterdiń Úılestirý keńesiniń alǵashqy otyrysy ótip jatyr. Oǵan BUU, halyqaralyq uıymdar men qarjy ınstıtýttarynyń, sheteldik damý agenttikteriniń, dıplomatııalyq korpýs pen bıznes ókilderi qatysyp jatyr.
Úılestirý keńesiniń otyrysynda BUUDB mınıstrlikpen birlesip daıyndaǵan 2024-2030 jyldarǵa arnalǵan Sý seriktestigi bastamasy tanystyryldy. Qujat QR Sý resýrstaryn basqarý júıesin damytý tujyrymdamasy negizinde ázirlendi jáne birneshe baǵyt boıynsha naqty is-sharalardy kózdeıdi. Atap aıtqanda, sý resýrstary boıynsha aqparattyq júıe ázirleý, klımattyq syn-tegeýrinderdi eskeretin sý sharýashylyǵy ınfraqurylymyn jańǵyrtý, zamanaýı ırrıgatsııalyq júıelerdi engizý jáne transshekaralyq sý yntymaqtastyǵy.
«Sý seriktestigi bastamasy donorlardy tartýǵa negiz beredi jáne memleket pen jeke sektor arasynda úılestirýge yqpal etedi. Baǵdarlama ınstıtýtsıonaldyq qurylym men aımaqtyq yntymaqtastyqty nyǵaıtý arqyly klımattyń ózgerýine tózimdilikti arttyrýǵa jáne sýdy turaqty basqarýǵa baǵyttalǵan. Ol Úkimettiń sý resýrstaryn tıimdi birlesip basqarýdy ilgeriletý jóninde kúsh–jigerin, ásirese kún saıyn ózektiligi artyp jatqan klımattyq syn-qater jaǵdaıynda qoldaýǵa arnalǵan», - dedi Sý resýrstary jáne ırrıgatsııa mınıstri Nurjan Nurjigitov.
