Astanada burshaq aralas jańbyr jaýdy

ASTANA. QazAqparat – Astana turǵyndary áleýmettik jelilerde qalanyń keı bóliginde jaýǵan burshaq aralas nóser jaýynnyń vıdeolarymen bólisip jatyr, dep habarlaıdy QazAqparat tilshisi.

Astanalyqtardyń aıtýynsha, qalada tabıǵı kataklızm birinshi ret bolyp turǵan joq. Máselen, búgin saǵat 13.00-den bastap Ońtústik-Shyǵys aýdanynda jarty saǵatqa jýyq kúshti jelmen qosa nóser jańbyr jaýyp, sońy burshaqqa ulassa, eski ortalyqqa tipti bir tamshy jańbyr da túspegen.
Telegram arnasynda qala turǵyndary jańbyr men burshaqtyń ǵana emes, sý basyp qalǵan kóshe men qıylystardyń da sýreti jáne vıdeolarymen bólisti. «Joldaǵy jaǵdaı qalaı, astanalyqtar?», «Jetisý» saıabaǵynda burshaq jaýdy», «Men ózendemin!» taqyryptaryndaǵy rolıkter tarap jatyr.

Sonymen qatar, áleýmettik jeli qoldanýshylary nóser jaýyn saldaryn joıýǵa 125 tehnıka jiberilgenin Astana qalasynyń baspasóz qyzmetine silteme jasaı otyryp habarlady. Astana kóshelerine tazartqysh kólik, motopompalar shyǵaryldy. Sonymen qatar, kún saıyn qalada kollektorlar men jańbyr jınalatyn jerler, qubyrlar ornalasqan oryndar tazalanyp, sý sorylady.Aıta ketsek, bıyl astanada 2,5 shaqyrym jaýyn qubyry salynady dep josparlanǵan.